ដោយៈ តែម សុខុម
ហុងកុង: ភាគហ៊ុនក្នុងក្រុមហ៊ុនអភិវឌ្ឍន៍អចលនទ្រព្យខ្នាតយក្សរបស់ចិន Evergrande បានហក់ឡើងស្រឺតៗ ខណៈការជួញដូរបានបន្តឡើងវិញកាលពីថ្ងៃអង្គារ ទី៣ ខែតុលា បន្ទាប់ពីផ្អាកការជួញដូរកាលពីសប្តាហ៍មុន នៅពេលក្រុមហ៊ុននេះប្រកាសថា ចៅហ្វាយធំរបស់ខ្លួន បានស្ថិតក្រោមការស៊ើបអង្កេតបទព្រហ្មទណ្ឌ។
ក្រុមហ៊ុននេះ បានក្លាយជាចំណុចស្នូលនៃវិបត្តិ ក្នុងវិស័យអចលនទ្រព្យរបស់ប្រទេសចិន ដែលបានបណ្ដាលឱ្យក្រុមហ៊ុនអចលនទ្រព្យចិនធំៗ ខកខានទូទាត់បំណុលជាបន្តបន្ទាប់ បង្កជាការព្រួយបារម្ភថា វិបត្តិនេះនឹងជះផលប៉ះពាល់ធ្ងន់ធ្ងរ ដល់សេដ្ឋកិច្ចចិន ទាំងមូល ហើយអាចនឹងរីករាលដាល់ទូទាំងពិភពលោក។
កាលពីថ្ងៃព្រហស្បតិ៍ សប្តាហ៍មុន ក្រុមហ៊ុន Evergrande បានប្រកាសគួរឱ្យភ្ញាក់ផ្អើលថា លោកXu Jiayin ដែលជាស្ថាបនិក និងជាប្រធានក្រុមហ៊ុន Evergrande ត្រូវបានសង្ស័យថា បានប្រព្រឹត្តបទល្មើសខុសច្បាប់ បន្ទាប់ពីមានសេចក្ដីរាយការណ៍ថា លោកត្រូវបានប៉ូលិសចាប់ខ្លួន។ នៅក្នុងថ្ងៃដដែលនោះ ភាគហ៊ុនរបស់ក្រុមហ៊ុននេះក៏ត្រូវបានផ្អាកការជួញដូរនៅក្រុងហុងកុង។
នៅពេលការជួញដូរបានបន្តឡើងវិញ កាលពីថ្ងៃអង្គារ តម្លៃភាគហ៊ុនរបស់ក្រុមហ៊ុននេះ បានហក់ឡើងជាង៦០% មុនពេលធ្លាក់ចុះមកនៅត្រឹម១០% ហើយបន្ទាប់មកក៏ហក់ឡើងវិញម្ដងទៀត។
ក្រុមហ៊ុន Evergrande បានប៉ាន់ប្រមាណថា គិតត្រឹមចុងខែមិថុនា ខ្លួនមានបំណុលចំនួន៣២៨ពាន់លានដុល្លារអាមេរិក ដែលជាប់ឈ្មោះជាប់ឈ្មោះ ជាក្រុមហ៊ុនអភិវឌ្ឍន៍អចលនទ្រព្យ ដែលជំពាក់បំណុលច្រើនបំផុតក្នុងពិភពលោក៕ Reuters៕