ភ្នំពេញៈ ការនាំទំនិញពីកម្ពុជាទៅសិង្ហបុរី ក្នុងរយៈពេល ៨ខែ ឆ្នាំ២០២៣ មានទឹកប្រាក់ជិត ៤៧៧ លានដុល្លារ កើនឡើងជិត ៥៥៥ ភាគរយ បើធៀបរយៈពេលដូចគ្នាក្នុងឆ្នាំ២០២២ ប៉ុន្តែសម្រាប់ទឺកប្រាក់បានពីពាណិជ្ជកម្មទ្វេភាគីបែរជាធ្លាក់ចុះជិត ៦៣ ភាគរយ។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា (GDCE)។
តារាងស្ថិតិជញ្ជីងពាណិជ្ជកម្មទំនិញរបស់ GDCE រយៈពេល ៨ ខែ ឆ្នាំ២០២៣ ឱ្យដឹងថា ចន្លោះពីខែមករា ដល់ខែសីហា ឆ្នាំ២០២៣ កម្ពុជា បាននាំចេញទំនិញទៅប្រទេសសិង្ហបុរី ក្នុងទឹកប្រាក់សរុប ៤៧៦,៩ លានដុល្លារ កើនឡើង ៥៥៤,៨ ភាគរយពីចំនួន ៧២,៨៤ លានដុល្លារ នារយៈពេលដូចគ្នាឆ្នាំ២០២២។ ចំណែកសិង្ហបុរី ក៏បាននាំទំនិញមកកម្ពុជា ក្នុងទឹកប្រាក់ ៦២៥,៧៨ លានដុល្លារដែរ ដោយធ្លាក់ចុះ ៧៨,៣ ភាគរយពីចំនួន ២,៨៩ ពាន់លានដុល្លារ។
ផ្អែកតាមតួលេខខាងលើ គឺទំហំពាណិជ្ជកម្មទ្វេភាគីក្នុងរយៈពេល ៨ខែ ឆ្នាំ២០២៣ សម្រេចបាន ១,១ ពាន់លានដុល្លារ ធ្លាក់ចុះ ៧៨,៣ ភាគរយបើធៀបរយៈពេល ៨ ខែឆ្នាំ២០២២ ដែលមាន ២,៩៦ ពាន់លានដុល្លារ។ សម្រាប់តុល្យភាពជញ្ជីងពាណិជ្ជកម្មទ្វេភាគី គឺកម្ពុជា មានឱនភាពប្រមាណ ១៤៨,៨៧ លានដុល្លារ ខុសគ្នាយ៉ាងច្រើនបើធៀបនឹងរយៈពេល ៨ខែ ឆ្នាំ២០២២ ដែលកម្ពុជា មានឱនភាពរហូតដល់ ២,៨២ ពាន់លានដុល្លារ។ សិង្ហបុរី គឺជាដៃគូពាណិជ្ជកម្មអន្តរជាតិធំជាងគេទី៦ របស់កម្ពុជា ដែលនាំមុខដោយប្រទេសចិន អាមេរិក វៀតណាម ថៃ និងប្រទេសជប៉ុន។
GDCE ឱ្យដឹងទៀតថា សម្រាប់ខែសីហា ឆ្នាំ២០២៣ ការធ្វើពាណិជ្ជកម្មរវាងប្រទេសទាំង២ មានទឹកប្រាក់សរុប ២១១,៤១ លានដុល្លារ ធ្លាក់ចុះ ៤០,៣៤ ភាគរយធៀប ខែសីហា ឆ្នាំ២០២២ ដោយការនាំចេញរបស់កម្ពុជា មានចំនួន ២៨,៨៥ លានដុល្លារ កើនឡើង ៥៥៦,៤ ភាគរយ និងទំនិញនាំមកពីសិង្ហបុរី ១៨២,៥៦ លានដុល្លារ ធ្លាក់ចុះ ៤៧,៨ ភាគរយ។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍នៅថ្ងៃទី២៧ ខែកញ្ញាថា អត្រាកំណើនដ៏ខ្ពស់នៃចំនួនទឹកប្រាក់នាំចេញទំនិញកម្ពុជាទៅសិង្ហបុរី គឺដោយសារកាលពីឆ្នាំ២០២២ ឥទ្ធិពលជំងឺកូវីដ១៩ បានធ្វើឱ្យការនាំទំនិញទៅសិង្ហបុរីធ្លាក់ចុះខ្លាំង។ ការនាំចេញទំនិញកម្ពុជាកើនឡើងខ្ពស់ គឺដោយសារក្រៅពីទំនិញសម្រាប់បំពេញតម្រូវការក្នុងប្រទេសសិង្ហបុរី ក៏មានទំនិញមួយចំនួន ត្រូវបានឈ្មួញនាំចេញទៅលក់បន្តនៅប្រទេសនានាផងដែរ។ លោកបន្តថា បច្ចុប្បន្នប្រទេសសិង្ហបុរី គឺមិនត្រឹមតែជាទីសំចតរបស់កប៉ាល់ដឹកជញ្ជូនទំនិញធំៗលំដាប់ពិភពលោកប៉ុណ្ណោះទេ ប៉ុន្តែក៏ជាកន្លែងផ្ទេរ និងវេចខ្ចប់ទំនិញ សម្រាប់នាំចេញទៅលក់បន្តទៅកាន់ទីផ្សារអន្តរជាតិផងដែរ។
លោកលើកឡើងទៀតថា៖«ការចូលជាធរមាននៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ដែលមានកម្ពុជា-សិង្ហបុរី ជាសមាជិក ស្របពេលប្រទេសទាំង២ កំពុងអនុវត្តកិច្ចព្រមព្រៀងស្តីពីការមិនយកពន្ធត្រួតគ្នា (DTA) ផងនោះ បានធ្វើឱ្យចរន្តនាំលំហូរទំនិញរវាងប្រទេសទាំង២ កើនឡើងជាលំដាប់។ ផលិតផលកសិកម្មកម្ពុជា ត្រូវបានរំពឹងថា នឹងមានវត្តមានកាន់តែច្រើន នៅទីផ្សារអន្តរជាតិ រួមទាំងប្រទេសសិង្ហបុរី»។
អនុប្រធានសភាកម្ពុជា លោក លឹម ហេង បាននិយាយថា កំណើនទឹកប្រាក់នាំចេញទំនិញពីកម្ពុជាទៅសិង្ហបុរី គឺអាចបានមកពីការចូលរួមចំណែកកាន់តែច្រើនពីផលិតផលកសិកម្ម ខណៈការនាំចេញផលិតផលវាយនភណ្ឌទៅទីនោះគឺកើតមានជាហូរហែមកហើយ។
លោកថ្លែងថា៖«ខ្ញុំមានជំនឿថា ការនាំចេញរបស់កម្ពុជាទៅសិង្ហបុរី នឹងបន្តកើនឡើងថែមទៀត។ ចំពោះការនាំចូលទំនិញរបស់សិង្ហបុរីដែលធ្លាក់ចុះ ក៏ដោយសារសមត្ថភាពផលិតកម្មនៅកម្ពុជា កើនឡើងផងដែរ»។
ទំនិញសក្តានុពលដែលកម្ពុជានាំទៅសិង្ហបុរី គឺផលិតផលសម្លៀកបំពាក់ កាបូប និងស្បែកជើង គ្រឿងបង្គុំអគ្គិសនី និងផលិតកសិកម្ម និងកសិឧស្សាហកម្ម ចំណែកទំនិញសិង្ហបុរីនាំមកកម្ពុជា គឺសម្ភារអេឡិចត្រូនិក-អគ្គិសនី សម្ភារសំណង់ និងឱសថមួយចំនួន។ នេះបើតាមលោក លឹម ហេង។
ទិន្នន័យក្រុមប្រឹក្សាអភិវឌ្ឍន៍កម្ពុជា (CDC) បានឱ្យដឹងថា គិតត្រឹមចុងឆមាសទី១ ឆ្នាំ២០២១ ការវិនិយោគផ្ទាល់បរទេសនៅកម្ពុជា មានទឹកប្រាក់សរុប ៣៩ ពាន់លានដុល្លារ ដោយមានអត្រាកំណើនមធ្យមប្រចាំឆ្នាំ ៩,៦ ភាគរយ។ ក្នុងចំណោមប្រទេសបណ្តាក់ទុននៅកម្ពុជា ច្រើនជាងគេ គឺសិង្ហបុរីស្ថិតនៅលេខ៤ ដោយមានប្រាក់ ២,៤ ពាន់លានដុល្លារស្មើ ៦,៤ ភាគរយ នៃការវិនិយោគផ្ទាល់បរទេសនៅកម្ពុជា។
ក្នុងឆ្នាំ២០២២ ការដោះដូរពាណិជ្ជកម្មទ្វេភាគីកម្ពុជា-សិង្ហបុរី មានទឹកប្រាក់សរុប ៣ ៣២២,៩៤លានដុល្លារ ធ្លាក់ចុះ ៣៦,៣ ភាគរយធៀបឆ្នាំ២០២១ ក្នុងនោះកម្ពុជា នាំទំនិញទៅសិង្ហបុរី ចំនួន ៩២,៥៧ លានដុល្លារ ធ្លាក់ចុះ ២២,៨ ភាគរយ និងសិង្ហបុរីនាំមកវិញចំនួន ៣ ២៣០,៣៧ លានដុល្លារ ធ្លាក់ចុះ ៣៦,៦ ភាគរយ។ នេះបើតាមអគ្គនាយកដ្ឋានគយ និងរដ្ឋាករកម្ពុជា៕
