ដោយ: គង់ លាងហួរ
អន្តរជាតិ: ផ្សារហ៊ុននៅតំបន់អាស៊ី បានធ្លាក់ថ្លៃនៅថ្ងៃព្រហស្បតិ៍នេះ ហើយប្រាក់ដុល្លារអាមេរិក បានហក់ឡើងថ្លៃយ៉ាងគំហុក ខណៈការហក់ឡើងខ្លាំងនៃតម្លៃប្រេង បានធ្វើឱ្យអ្នកវិនិយោគមានការភ័យខ្លាច។
សន្ទស្សន៍ភាគហ៊ុនអាស៊ីប៉ាស៊ីហ្វិកដ៏ធំបំផុត របស់ក្រុមហ៊ុនអាមេរិក MSCI នៅខាងក្រៅប្រទេសជប៉ុន (.MIAPJ0000PUS) បានធ្លាក់ថ្លៃជិតដល់កម្រិតទាបបំផុត ក្នុងរយៈពេល១០ខែនៅក្នុងការជួញដូរដំបូង។
ផ្សារហ៊ុន Nikkei (.N225) របស់ជប៉ុនបានធ្លាក់ថ្លៃ១,៥% ខណៈប្រាក់យ៉េនជប៉ុន បានធ្លាក់ថ្លៃយ៉ាងគំហុក ដោយជួញដូរ ក្នុងរង្វង់១៥០យ៉េនក្នុង១ដុល្លារ ដែលត្រូវបានគេមើលឃើញថា ជាកម្រិតមួយ ដែលអាចបង្កឱ្យមានការឆ្លើយតប ឬអន្តរាគមន៍ជាផ្លូវការពីអាជ្ញាធរជប៉ុន។
ផ្សារហ៊ុនចិនដីគោក (.SSEC) ស្ថិតនៅទ្រឹង ខណៈដែលផ្សារហ៊ុន Hang Seng (.HSI) បានធ្លាក់ថ្លៃ១%។ ភាគហ៊ុននៅក្នុងក្រុមហ៊ុនChina Evergrande (3333.HK) ត្រូវបានផ្អាកការជួញដូរ បន្ទាប់ពីមានរបាយការណ៍ថា ប្រធានរបស់ក្រុមហ៊ុននេះគឺលោកHui Ka-Yan ត្រូវបានដាក់ឱ្យស្ថិត នៅក្រោមការត្រួតពិនិត្យរបស់ប៉ូលីស។
ប្រាក់អឺរ៉ូបានធ្លាក់ថ្លៃចុះ០,៧% ដល់កម្រិតទាបបំផុតក្នុងរយៈពេល៩ខែ ដោយបានជួញដូរ មកនៅត្រឹម១,០៤៨៨ដុល្លារក្នុង១អឺរ៉ូ កាលពីថ្ងៃពុធម្សិលមិញនេះ ហើយចុងក្រោយបានជួញដូរនៅត្រឹម១,០៥១១ដុល្លារក្នុង១អឺរ៉ូ។
ប្រាក់ដុល្លារអាមេរិកបានហក់ឡើងថ្លៃ ដល់កម្រិតខ្ពស់បំផុត ក្នុងរយៈពេល១០ខែ ធៀបនឹងរូបិយប័ណ្ណដៃគូធំៗរបស់ខ្លួន ខណៈពេលដែលផលប័ត្ររតនាគារ បានកើនឡើងដល់កម្រិតកំពូល ក្នុងរយៈពេល១៦ឆ្នាំ។
តម្លៃប្រេងបានកើនឡើង ដល់កម្រិតខ្ពស់បំផុតក្នុងរយៈពេល១ឆ្នាំនៅថ្ងៃព្រហស្បតិ៍នេះ។ តួយ៉ាង តម្លៃប្រេងឆៅអាមេរិកបានកើនឡើង៣,៦%ពេញមួយយប់ និងកើន១%ទៀតនៅថ្ងៃព្រហស្បតិ៍នេះដល់៩៥ដុល្លារក្នុងមួយបារ៉ែល ជាលើកដំបូងគិតចាប់តាំងពីខែសីហា ឆ្នាំមុន។ តម្លៃប្រេង Brent futures បានកើនឡើងដល់កម្រិតខ្ពស់បំផុតក្នុងមួយឆ្នាំគឺ៩៧,៦៩ដុល្លារក្នុងមួយបារ៉ែល៕
