ដោយ: គង់ លាងហួរ
ហាណូយ: ក្រុមហ៊ុនផលិតបន្ទះសូឡារបស់ចិន Trina Solar គ្រោងសាងសង់រោងចក្រទី៣របស់ខ្លួន នៅក្នុងប្រទេសវៀតណាម ដើម្បីជំរុញការនាំចេញទៅកាន់សហរដ្ឋអាមេរិក ខណៈបន្ទះសូឡាដែលក្រុមហ៊ុននេះ ផលិតនៅប្រទេសថៃរងការដាក់ទណ្ឌកម្មពន្ធ។
Trina ដែលជាក្រុមហ៊ុនផលិតបន្ទះ ស្រូបពន្លឺព្រះអាទិត្យដ៏ធំបំផុតមួយរបស់ពិភពលោក គ្រោបោះទុនវិនិយោគ៤០០លានដុល្លារដើម្បីសាងសង់រោងចក្រ នៅប្រទេសវៀតណាម ដែលនឹងលាតសន្ធឹ ងលើផ្ទៃដី២៥ហិកតា។
យោងតាមប្រភពមួយ ដែលទទួលបានព័ត៌មានអំពីផែនការនេះបានឱ្យដឹងថា ផលិតកម្មរបស់រោងចក្រគ្រោង នឹងចាប់ផ្តើមនៅឆ្នាំ២០២៥។
ប្រភពបដិសេធមិនបញ្ចេញឈ្មោះ ព្រោះព័ត៌មានលម្អិតអំពីគម្រោងនៅតែត្រូវរក្សាការសម្ងាត់។ ចំណែក ក្រុមហ៊ុន Trina ក៏មិនបានឆ្លើយតប នឹងសំណើសុំការអត្ថាធិប្បាយនោះដែរ។
គម្រោងវិនិយោគរបស់ក្រុមហ៊ុន Trina នៅវៀតណាម ធ្វើឡើង បន្ទាប់ពីការស៊ើបអង្កេត ដោយក្រសួងពាណិជ្ជកម្មអាមេរិករកឃើញថា Trina ស្ថិតក្នុងចំណោមក្រុមហ៊ុន ផលិតបន្ទះសូឡាចំនួន៥របស់ប្រទេសចិន ដែលបានប្រើប្រាស់រោងចក្ររបស់ពួកគេ នៅប្រទេសថៃ និងបណ្តាប្រទេស នៅតំបន់អាស៊ីអាគ្នេយ៍ផ្សេងទៀត ដើម្បីគេចវេសពីការដាក់ពន្ធទណ្ឌកម្មដោយសហរដ្ឋអាមេរិក។
ពន្ធទាំងនេះ ដែលនឹងត្រូវចូលជាធរមាន ចាប់ពីពាក់កណ្តាលឆ្នាំ២០២៤ខាងមុខ ជះផលប៉ះពាល់តែមក លើប្រតិបត្តិការរបស់ក្រុមហ៊ុន Trina នៅក្នុងប្រទេសថៃប៉ុណ្ណោះ គិតរហូតមកដល់ពេលនេះ។
បណ្តាប្រទេសនៅតំបន់អាស៊ី គ្របដណ្តប់ប្រហែល៨០ភាគរយនៃការផ្គត់ផ្គង់បន្ទះសូឡា សរុបទៅកាន់សហរដ្ឋអាមេរិក ខណៈប្រទេសវៀតណាម បានចូលរួមចំណែកប្រហែល១/៣ នៃការនាំចូលសរុប នៅក្នុងត្រីមាសទីមួយ ឆ្នាំ២០២៣នេះ៕