ដោយ: គង់ លាងហួរ
បាងកក: លោក Pairoj Chotikasatien អគ្គនាយកនៃនាយកដ្ឋានការងារ (DOE) បានលើកឡើងកាលពីថ្ងៃព្រហស្បតិ៍កន្លងទៅថា ក្រសួងការងារថៃ បានកំណត់គោលដៅបញ្ជូនកម្មករជំនាញ ចំនួន១០០.០០០នាក់ ទៅក្រៅប្រទេសនៅឆ្នាំ២០២៤ខាងមុខ។
លោក Pairoj បានបន្តថា គោលដៅនេះ ឆ្លុះបញ្ចាំងឱ្យឃើញពីគោលនយោបាយរបស់រដ្ឋមន្ត្រីក្រសួងការងារថ្មី ដែលចង់បង្កើនកិច្ចខិតខំប្រឹងប្រែង សម្រាប់ប្រជាជនថៃ ដែលកំពុងធ្វើការនៅបរទេស។
លោក Pairoj បានអះអាងថា នាយកដ្ឋានការងារ (DOE) គ្រោងនឹងផ្តល់ការគាំទ្រដល់ពលករថៃ ក្នុងការស្វែងរកឱកាសការងារស្របច្បាប់នៅបរទេស។
លោកបញ្ជាក់ទៀតថា ទីភ្នាក់ងាររបស់លោក នឹងបង្កើនកិច្ចខិតខំប្រឹងប្រែង ក្នុងការបញ្ជូនពលករថៃទៅកាន់ទីផ្សារ ដែលមានតម្រូវការការងារខ្ពស់ ដូចជា នៅប្រទសស៊ុយអែត ហ្វាំងឡង់ អ៊ីស្រាអែល ជប៉ុន កូរ៉េខាងត្បូង និងតៃវ៉ាន់ ខណៈនាយកដ្ឋានក៏កំពុងស្វែងរកឱកាសពង្រីកទៅកាន់ប្រទេសផ្សេងទៀតដែរ។
លោក Pairoj បានបន្ថែមថា នាយកដ្ឋានក៏មានគម្រោងបញ្ជូនកម្លាំងពលកម្មថៃ ដែលមានជំនាញភាគច្រើន ទៅកាន់ទីផ្សារដែលកំពុងរីកចម្រើនទាំងនេះ ដែលចាប់អារម្មណ៍ ក្នុងការជួលពលករពីប្រទេសរបស់យើង។
លោក Pairoj បានឱ្យដឹងទៀតថា ប្រទេសនូវែលសេឡង់ចាប់អារម្មណ៍លើកម្មករថៃ សម្រាប់តួនាទីក្នុងសេវាកម្ម និងកសិកម្ម ព្រមទាំងមុខតំណែងផ្សេងៗ ដូចជា ស្ថាបត្យករ ទន្តបណ្ឌិត និងគិលានុបដ្ឋាយិកា។
លោកបន្តថា ទន្ទឹមគ្នានេះ ប្រទេសអូស្ត្រាលី កំពុងទន្ទឹងរង់ចាំការជួលចុងភៅជនជាតិថៃ ជាពិសេសចុងភៅ ដែលទទួលបានលិខិតបញ្ជាក់ពីនាយកដ្ឋានអភិវឌ្ឍន៍ជំនាញ។
សម្រាប់ជំហានបន្ទាប់ នាយកដ្ឋានការងារ (DOE) របស់ប្រទេសថៃកំពុងទន្ទឹងរង់ចាំការចរចា ជាមួយបណ្តាប្រទេសនានា ទាក់ទងនឹងការងាររបស់ពលករថៃ៕
