ដោយ: គង់ លាងហួរ
គូឡាឡាំពួរ: ប្រទេសម៉ាឡេស៊ីត្រូវបានគេព្យាករថា នឹងទទួលស្វាគមន៍ ការមកដល់របស់ភ្ញៀវទេសចរអន្តរជាតិ យ៉ាងតិចណាស់១៨លាននាក់ក្នុងឆ្នាំ២០២៣នេះ ពោលគឺអាចលើសពីគោលដៅកំណត់ដំបូងចំនួន១៦,១លាននាក់។
លោក Ammar Abdul Ghapar អគ្គនាយកផ្នែកទេសចរណ៍នៃប្រទេសម៉ាឡេស៊ីបានបញ្ជាក់ប្រាប់ក្រុមប្រឹក្សាទេសចរណ៍ របស់ប្រទេសហ្ស៊កដានី ក្នុងកិច្ចប្រជុំមួយ កាលពីពេលកន្លងមកថា គោលដៅរបស់យើងត្រូវបានកំណត់ឡើង ដោយផ្អែកលើកត្តាជាច្រើន។
កត្តាទាំងនោះរួមមាន ដូចជា ការកើនឡើងនៃប្រេកង់ក្រុមហ៊ុនអាកាសចរណ៍ ការពង្រីកជើងហោះហើរ និងភាពទាក់ទាញរបស់ថ្ងៃឈប់សម្រាកដំណាច់ឆ្នាំ ដែលនឹងជួយជំរុញឱ្យភ្ញៀវទេសចរបរទេសចូលមកទស្សនា ប្រទេសម៉ាឡេស៊ីកាន់តែច្រើនបន្ថែមទៀត។
ចំពោះឆ្នាំ២០២៣នេះ ប្រទេសម៉ាឡេស៊ី បានដាក់ចេញគោលដៅទាក់ទាញភ្ញៀវទេសចរអន្តរជាតិ ឱ្យបានចំនួន១៦,១លាននាក់។ ទោះជាយ៉ាងនេះក្តី ប្រទេសនេះ ទទួលបានការមកដល់របស់ភ្ញៀវទេសចរបរទេសចំនួន៤,៥លាននាក់រួចមកហើយ នៅក្នុងត្រីមាសទី១។
លោក Ammar Abdul បានកត់សម្គាល់ថា ជាមួយនឹងកំណើនប្រកបដោយសញ្ញាវិជ្ជមាននេះ ហើយប្រសិនបើគ្មានអ្វីខុសនោះទេ ប្រទេសយើង នឹងអាចទទួលបានភ្ញៀវទេសចរបរទេស ចំនួន១៨លាននាក់នៅឆ្នាំ២០២៣នេះ ដែលលើសពីគោលដៅ៕
