ដោយ: គង់ លាងហួរ
អន្តរជាតិ: ក្រុមហ៊ុន Hyundai Motor Group បានអះអាងថា ខ្លួនបានឈរនៅលើកំពូលតារាង នៃការលក់រថយន្តអគ្គិសនី នៅក្នុងទីផ្សារឥណ្ឌូនេស៊ី ដែលជាប្រទេសមានចំនួនប្រជាជនច្រើនជាងគេទី៤ ។
ក្រុមហ៊ុនបានលក់រថយន្ត EV សរុបចំនួន៣.៩១៣គ្រឿង និងបានប្រកាសចំណែកទីផ្សារ៥៦,៥% នៅប្រទេសឥណ្ឌូនេស៊ី គិតត្រឹមខែកក្កដា។ ជាក់ស្តែង រថយន្តអគ្គិសនីដំបូងគេ របស់ក្រុមហ៊ុនប្រភេទ Ioniq 5 មានការលក់ដាច់ខ្លាំងរហូតដល់ទៅ៣.៨១៩គ្រឿង។
Ioniq 5 គឺជារថយន្ត EV ដំបូងគេដែលផលិតនៅរោងចក្រក្នុងប្រទេសឥណ្ឌូនេស៊ី ហើយបានចាប់ផ្តើមប្រតិបត្តិការពាណិជ្ជកម្ម ក្នុងខែមីនា ឆ្នាំ២០២២។ នេះបើយោងតាមក្រុមហ៊ុន Hyundai ។
លើសពីនេះ ក្រុមហ៊ុន Hyundai បានវ៉ាដាច់ក្រុមហ៊ុនផលិតរថយន្តមកពីប្រទេសចិន Wuling Motors ដែលសម្រេចបានការលក់រថយន្ត EV ដាច់ជាងគេបំផុតលេខ១ នៅក្នុងទីផ្សារប្រទេសឥណ្ឌូនេស៊ីកាលពីឆ្នាំមុន។
ក្នុងអំឡុងពេលប្រារព្ធពិធីអបអរសាទរ ការសាងសង់រោងចក្រផលិតរថយន្ត នៅប្រទេសឥណ្ឌូនេស៊ី នៅទីក្រុង Bekasi ដែលធ្វើឡើងក្នុងខែដដែលនោះ ប្រធានាធិបតីឥណ្ឌូនេស៊ី លោក Joko Widodo បានថ្លែងថា “រថយន្តIoniq5 នឹងក្លាយជាព្រឹត្តិការណ៍ដ៏សំខាន់មួយ ក្នុងការអភិវឌ្ឍទីផ្សារ EV របស់ប្រទេសយើង”។
ដើម្បីពន្លឿនយុទ្ធសាស្រ្តអគ្គិសនី ភាវូបនីយកម្មរបស់ខ្លួន ក្រុមហ៊ុន Hyundai គ្រោងនឹងពង្រីកទីតាំងរបស់ខ្លួនបន្ថែមទៀត នៅក្នុងប្រទេសឥណ្ឌូនេស៊ី ដែលជាប្រទេសកំពុងរីកចម្រើនដ៏កំពូលមួយ និងជាប្រទេសមានមហិច្ឆិតា ចង់ក្លាយជាមជ្ឈមណ្ឌល EV របស់តំបន់អាស៊ាន ដោយប្រើប្រាស់សារធាតុនី កែលដ៏សម្បូរបែបនៅក្នុងស្រុក៕