ដោយៈ គង់ សូរិយា
ភ្នំពេញៈ បើទោះបីជាមានកំណើនសាងសង់ផ្ទះ ត្រចៀកកាំក្តី ប៉ុន្តែទឹកមាត់ត្រចៀកកាំមានតម្រូវការខ្ពស់ ដែលធ្វើឲ្យការផលិតមិនទាន់ឆ្លើយតបតាមតម្រូវការទីផ្សារនៅឡើយ។
ប្រធានសមាគមត្រចៀកកាំខ្មែរលោកស៊ុយ កុកធានបានមានប្រសាសន៍ឲ្យដឹងកាលពីថ្ងៃម្សិលម៉ិញនេះថា ប៉ុន្មានឆ្នាំចុងក្រោយនេះ ការសាងសង់ផ្ទះត្រចៀកកាំ មានកំណើនគួរឱ្យកត់សម្គាល់ ប៉ុន្តែដោយសារកំណើន នៃតម្រូវការសម្បុកត្រចៀកកាំ ធ្វើឱ្យការផ្គត់ផ្គង់មិនទាន់អាចបំពេញសេចក្តីត្រូវការ របស់ទីផ្សារបាននៅឡើយទេ។
លោកបន្តថា ក្នុងរយៈពេល៣ទៅ៤ ចុងក្រោយនេះ នៅក្នុងប្រទេសកម្ពុជា មានការសម្រុកសាងសង់ផ្ទះត្រចៀកកាំច្រើន បើទោះបីជាក្នុងពេលមានវិបត្តិជំងឺកូវីដ១៩ ក៏ការសាងសង់ផ្ទះត្រចៀកកាំមានច្រើនដែរ។លោកបន្ថែមថា “បើទោះជាមានកំណើននៃការចិញ្ចឹម និងសាងសង់ផ្ទះ ត្រចៀកកាំច្រើនបែបនេះក៏ដោយ តែយើងនៅតែមិនទាន់អាចបំពេញតម្រូវការទីផ្សារបាននៅឡើយទេ”។
បរិមាណនៃតម្រូវការសម្បុកត្រចៀកកាំ មានការកើនឡើងគួរឱ្យកត់សម្គាល់ ជាពិសេសនៅទីផ្សារក្រៅប្រទេស ដូចជា ក្រុងហុងកុង ក៏ដូចជាប្រទេសចិន។
លោក ស៊ុយ កុកធាន បានបន្តថា តម្រូវការសម្បុកត្រចៀកកាំពីប្រទេសកម្ពុជាច្រើននេះ ដោយសារតែកម្ពុជា មានលក្ខខណ្ឌអាកាសធាតុល្អ ដោយសត្វត្រចៀកកាំនេះ វារស់នៅក្នុងសីតុណ្ហភាពមួយជាក់លាក់ គឺ៣១អង្សារ និងមានទន្លេបឹងបួរច្រើន រួមទាំងព្រៃឈើដែលសម្បូរដោយចំណីរបស់ត្រចៀកកាំ ធ្វើឱ្យផលិតផលសម្បុកត្រចៀកមានគុណភាពល្អជាងប្រទេសមួយក្នុងតំបន់។
លោកបន្តថា “ប្រទេសកម្ពុជាយើង មិនទាន់មានការបំពុលបរិយាកាសខ្លាំង ដូចស្រុកគេនៅឡើយទេ។ ដូច្នេះប្រភពនៃចំណីរបស់ត្រចៀកកាំ នៅមានច្រើន ដែលជាហេតុធ្វើឱ្យការសាងសង់ផ្ទះត្រចៀកកាំនៅខេត្តណាក៏ទទួលបានជោគជ័យដែរ ប្រសិនបើអ្នកចិញ្ចឹម គាត់រៀបចំបច្ចេកទេសបានត្រឹមត្រូវ”៕
