ដោយៈ និស្ស័យ
ឥណ្ឌូនេស៊ីៈ បណ្តារដ្ឋមន្រ្តីពាណិជ្ជកម្មអាស៊ាន បាននិងកំពុង ពង្រឹងសមាហរណកម្មសេដ្ឋកិច្ចរបស់ខ្លួន ដើម្បីកែលម្អលំហូរពាណិជ្ជកម្ម និងការវិនិយោគឆ្លងដែន ដោយប្រើប្រាស់ថវិកាចំនួនប្រមាណ២ពាន់ពាន់លានដុល្លារអាមេរិក ទៅលើសេដ្ឋកិច្ចឌីជីថលនៅឆ្នាំ២០៣០។
ការចរចាលើកិច្ចព្រមព្រៀងសេដ្ឋកិច្ចឌីជីថល ទូទាំងតំបន់នេះដែរធ្វើឡើង នាកិច្ចប្រជុំរដ្ឋមន្ត្រីសេដ្ឋកិច្ចអាស៊ាន (AEM) លើកទី៥៥ ដែលប្រារព្ធធ្វើនៅទីក្រុង Semarang ប្រទេសឥណ្ឌូនេស៊ីកាលពីចុងសប្តាហ៍នេះ។
កិច្ចប្រជុំAEM ក៏បានអនុម័តការសិក្សា លើកិច្ចព្រមព្រៀងក្របខ័ណ្ឌសេដ្ឋកិច្ចឌីជីថលអាស៊ាន (DEFA) ដែលជាការត្រួសត្រាយផ្លូវសម្រាប់ប្រទេសសមាជិកទាំង១០ដើម្បីចាប់ផ្តើមការចរចា។
ការចរចារបស់ DEFA ត្រូវបានគេរំពឹងថា នឹងចាប់ផ្តើមជាផ្លូវការនៅក្នុងកិច្ចប្រជុំក្រុមប្រឹក្សា សហគមន៍សេដ្ឋកិច្ចអាស៊ាន (AEC) លើកទី២៣ ហើយនឹងត្រូវបានទទួលស្គាល់ជាផ្លូវការ ដោយមេដឹកនាំអាស៊ាន នៅក្នុងកិច្ចប្រជុំកំពូលអាស៊ានលើកទី៤៣ នៅទីក្រុងហ្សាការតាក្នុងខែកញ្ញាខាងមុខ។
Boston Consulting Group ដែលជាក្រុមហ៊ុនប្រឹក្សាដ៏ធំរបស់អាមេរិកបានព្យាករថា សេដ្ឋកិច្ចឌីជីថលរបស់អាស៊ាន នឹងកើនឡើង ៣ ដងពីបច្ចុប្បន្នដែលមានប្រហែល៣០០ពាន់លានដុល្លារ ដល់១ ពាន់ពាន់លានដុល្លារ នៅចុងទសវត្សរ៍នេះគឺឆ្នាំ២០៣០ តាមរយៈការទទួលយកបច្ចេកវិទ្យាថ្មីៗ។
លោក Gan Kim Yong រដ្ឋមន្ត្រីក្រសួងពាណិជ្ជកម្ម និងឧស្សាហកម្មសិង្ហបុរីបាននិយាយថា កិច្ចប្រជុំ AEM ប្រចាំឆ្នាំបូករួមទាំងលទ្ធផលពីកិច្ចប្រជុំថ្មីនេះ គឺជាសក្ខីភាពបញ្ជាក់ពីការប្តេជ្ញាចិត្ត និងការខិតខំប្រឹងប្រែងរបស់ប្រទេសអាស៊ាន ដើម្បីរក្សាការបើកចំហទំនាក់ទំនង និងសមាហរណកម្មរវាងគ្នា។
អាស៊ានជាដៃគូពាណិជ្ជកម្ម ធំជាងគេរបស់សិង្ហបុរីលើទំនិញ និងជាគោលដៅ វិនិយោគធំជាងគេរបស់សិង្ហបុរី។ បើតាមក្រសួងពាណិជ្ជកម្ម និងឧស្សាហកម្មសិង្ហបុរីនៅឆ្នាំ២០២២ ពាណិជ្ជកម្មសរុបរបស់សិង្ហបុរី ជាមួយអាស៊ានមានចំនួន៣៤៤,៣ ពាន់លានដុល្លារកើនឡើងប្រហែល១៩ភាគរយ បើធៀបនឹងឆ្នាំមុន ដោយក្នុងនោះសិង្ហបុរី បានវិនិយោគ២៣,៩ពាន់លានដុល្លារ ចូលតំបន់អាស៊ានក្នុងឆ្នាំ ២០២២ កើនឡើង៨ភាគរយធៀបនឹងឆ្នាំមុន។
រដ្ឋមន្ត្រីអាស៊ានក៏បានចុះហត្ថលេខា លើអនុស្សរណៈនៃការយោគយល់ ជាមួយអង្គការកម្មសិទ្ធិបញ្ញាពិភពលោក ដើម្បីជួយអាជីវកម្ម ក្នុងតំបន់ឱ្យកាន់តែមានភាពប្រសើរឡើង ក្នុងការបង្កើនឥទ្ធិពល និងរក្សាកម្មសិទ្ធិបញ្ញា (IP) នៃផលិតផលរបស់ពួកគេ។
ទោះបីអតិផរណាពិភពលោកបានធូរស្រាល តម្លៃនៃទំនិញម្ហូបអាហារ និងថាមពលនៅតែផុយស្រួយនៅឡើយ ដោយសារតែការរំខានដល់ការផ្គត់ផ្គង់ ដែលបណ្តាលមកពីជម្លោះ អូសបន្លាយនៅអឺរ៉ុបខាងកើត។
រដ្ឋមន្ត្រីសេដ្ឋកិច្ចអាស៊ានក៏បានទទួលស្គាល់ថា ការរឹតបន្តឹងគោលនយោបាយរូបិយវត្ថុ ដោយប្រទេសសេដ្ឋកិច្ចធំៗ អាចប៉ះពាល់ធ្ងន់ធ្ងរ ដល់ការរំពឹងទុកសម្រាប់កំណើនសេដ្ឋកិច្ចសកល៕
