ដោយ: គង់ លាងហួរ
ភ្នំពេញ: រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានមានប្រសាសន៍នៅថ្ងៃពុធនេះថា កម្ពុជាប្តេជ្ញាធានាការផ្គត់ផ្គង់អាហារប្រកបដោយសុវត្ថិភាព និងសុខភាពល្អសម្រាប់ទាំងអស់គ្នា។
លោកបានថ្លែងបែបនេះក្នុងសុន្ទរកថាមួយនៅឯព្រឹត្តិការណ៍សុវត្ថិភាពអាហារដែលប្រារព្ធធ្វើឡើងនៅរាជធានីភ្នំពេញ ដោយមានអ្នកចូលរួមប្រមាណ៣០០នាក់ក្នុងវិស័យកសិកម្ម អាហារ និងអាហារូបត្ថម្ភ។
លោក ឌិត ទីណា បានថ្លែងថា “ជំងឺឆ្លងតាមអាហារគឺជាបញ្ហាសុខភាពសាធារណៈដ៏សំខាន់នៅកម្ពុជា ហើយយើងប្តេជ្ញាធានាថា ការផ្គត់ផ្គង់អាហាររបស់យើងមានសុវត្ថិភាព និងសុខភាពល្អសម្រាប់ប្រជាជនកម្ពុជាទាំងអស់ តាមរយៈវិធីសាស្រ្តពហុវិស័យ ដែលនឹងនាំទៅរករបបអាហារដែលមានសុវត្ថិភាព និងមានសុខភាពល្អ ងាយស្រួលអាចរកបាន មានតម្លៃសមរម្យ និងឆ្លើយតបទៅនឹងគ្រប់ទម្រង់នៃបញ្ហាអាហារូបត្ថម្ភ”។
ទោះយ៉ាងនេះក្តី លោកបញ្ជាក់ថា ការងារនេះទាមទារឱ្យមានកិច្ចសហប្រតិបត្តិការល្អពីភាគីពាក់ព័ន្ធនានា និងមានឆន្ទៈក្នុងចំណោមភាគីពាក់ព័ន្ធរៀងៗខ្លួនក្នុងការអនុវត្តសុវត្ថិភាពចំណីអាហារ។
យោងតាមសេចក្តីថ្លែងការណ៍សារព័ត៌មាន បន្ទាប់ពីព្រឹត្តិការណ៍នេះបានឲ្យដឹងថា សុវត្ថិភាពអាហារនៅតែជាក្តីបារម្ភចំពោះសុខភាពសាធារណៈយ៉ាងសំខាន់នៅកម្ពុជា។
លោកស្រី Nargiza Khodjaeva តំណាងស្តីទីរបស់អង្គការសុខភាពពិភពលោក (WHO) ប្រចាំកម្ពុជា បានមានប្រសាសន៍ថា សុវត្ថិភាពចំណីអាហារ អាហារូបត្ថម្ភ និងសន្តិសុខស្បៀងមិនត្រឹមតែរួមចំណែកដល់សុខភាព និងសុខុមាលភាពរបស់ប្រជាជនប៉ុណ្ណោះទេ ប៉ុន្តែថែមទាំងជួយដល់សេដ្ឋកិច្ចជាតិ និងជំរុញការអភិវឌ្ឍប្រកបដោយចីរភាពផងដែរ៕Xinhua៕