ដោយ: គង់ លាងហួរ
ស៊ីដនី: ការជួញដូរផ្សារហ៊ុននៅតំបន់អាស៊ីស្ថិតក្នុងភាពមិនច្បាស់លាស់នៅថ្ងៃពុធនេះ បន្ទាប់ពីទិន្នន័យអតិផរណារបស់ប្រទេសចិនបានបញ្ជាក់ថា ការស្ទុះងើបឡើងវិញនៃសេដ្ឋកិច្ចកំពុងបាត់បង់ថាមពល ខណៈមានការព្រួយបារម្ភជាថ្មីអំពីស្ថិរភាពធនាគារអាមេរិក។
សន្ទស្សន៍ ហ៊ុនអាស៊ីប៉ាស៊ីហ្វិកធំបំផុតរបស់ក្រុមហ៊ុន MSCI នៅក្រៅប្រទេសជប៉ុនបានងើបឡើងថ្លៃ០,១ភាគរយ បន្ទាប់ពីធ្លាក់ថ្លៃ១,២ភាគរយ កាលពីមួយថ្ងៃមុន។ ផ្សារហ៊ុនNikkei របស់ប្រទេសជប៉ុនធ្លាក់ថ្លៃ០,១ភាគរយ។
ផ្សារហ៊ុនបន្ទះឈីបពណ៌ខៀវរបស់ប្រទេសចិនបានធ្លាក់ថ្លៃ០,២ភាគរយ ខណៈដែលសន្ទស្សន៍ Hang Seng របស់ហុងកុងបានធ្លាក់ថ្លៃ០,៥ភាគរយ។
ផ្សារហ៊ុនរបស់ក្រុមហ៊ុនអភិវឌ្ឍអចលនទ្រព្យចិន ដែលបានចុះបញ្ជីក្នុងទីក្រុងហុងកុងបានធ្លាក់ថ្លៃ០,៥ភាគរយ បន្ទាប់ពីធ្លាក់ថ្លៃ៤,៨ភាគរយកាលពីមួយថ្ងៃមុន ដោយសារការព្រួយបារម្ភអំពីវិស័យអចលនទ្រព្យ ដែលជាសសរស្តម្ភដ៏សំខាន់មួយនៃកំណើនសេដ្ឋកិច្ចចិន។
លោក Chetan Ahya ប្រធានសេដ្ឋវិទូប្រចាំតំបន់អាស៊ីនៅក្រុមហ៊ុន Morgan Stanley បានលើកឡើងថា “ប្រទេសចិនកំពុងប្រឈមមុខនឹងបញ្ហាជាថ្មី ដែលបង្កឡើងដោយបញ្ហាប្រឈម 3D នៃបំណុល ប្រជាសាស្រ្ត និងបរិត្តផរណា”។
នៅសង្កាត់ Wall Street ភាគហ៊ុន The Dow បានធ្លាក់ថ្លៃ០,៥ភាគរយ ភាគហ៊ុន S&P 500 បានធ្លាក់ថ្លៃ០,៤ភាគរយ ហើយភាគហ៊ុន Nasdaq Composite បានធ្លាក់ថ្លៃ០,៨ភាគរយ៕
