ដោយៈ គង់ ម៉ាលីនណា
ភ្នំពេញៈ ធនាគារជាតិនៃកម្ពុជា(NBC)បានឱ្យដឹងថា ខ្លួនកំពុងជំរុញឱ្យគ្រឹះស្ថានហិរញ្ញវត្ថុ ដែលជាសមាជិកប្រើប្រាស់នូវស្តង់ដា EMV chip និងស្តង់ដាលេខអត្តសញ្ញាណប័ណ្ណទូទាត់ (BIN) ៩១១៦ លើការចេញផ្សាយបណ្ណទូទាត់ក្នុងស្រុក និងពង្រឹងគោលការណ៍សុវត្ថិភាពលើម៉ាស៊ីន ATM/POS។
ការណែនាំនេះធ្វើឡើង ដើម្បីត្រៀមខ្លួនសម្រាប់សមាហរណកម្មក្នុងតំបន់ដោយប្រើប្រាស់បណ្ណទូទាត់ CSS បន្ថែមពីលើមធ្យោបាយផ្សេងៗ ដែលបានអនុវត្តកន្លងមក។ នេះបើយោងតាមការលើកឡើងរបស់មន្ត្រី ជាន់ខ្ពស់នៃ NBC។
លោកស្រី ជា សិរី ទេសាភិបាលរង NBC ថ្លែងក្នុងកម្មវិធី១កាលពីថ្ងៃទី៤ ខែកក្កដា ថា NBC បានពង្រឹង និងរៀបចំបទប្បញ្ញត្តិសមស្របលើការត្រួតពិនិត្យ ការគ្រប់គ្រងផលិតផល និងសេវាទូទាត់ថ្មីៗ និងគ្រឹះស្ថានផ្តល់សេវាទូទាត់សងប្រាក់ ស្របតាមបទប្បញ្ញត្តិជាតិ អន្តរជាតិ និងឧត្តមានុវត្តន៍អន្តរជាតិ សំដៅលើកកម្ពស់ជំនឿចិត្តសាធារណជនលើប្រព័ន្ធទូទាត់សងប្រាក់ និងការធ្វើសមាហរណកម្មក្នុងតំបន់។
លោកស្រីថា NBC បាននិងកំពុង ជំរុញគ្រឹះស្ថានសមាជិកប្រើប្រាស់ស្តង់ដា EMV chip និងស្តង់ដាលេខអត្តសញ្ញាណ ប័ណ្ណទូទាត់ (BIN) ៩១១៦ លើការចេញផ្សាយបណ្ណទូទាត់ក្នុងស្រុក និងពង្រឹងគោលការណ៍សុវត្ថិភាព លើម៉ាស៊ីនATM/POS ដើម្បីត្រៀមខ្លួនសម្រាប់សមាហរណកម្ម ក្នុងតំបន់ដោយប្រើប្រាស់បណ្ណទូទាត់ CSS បន្ថែមពីលើមធ្យោបាយផ្សេងៗ ដែលបានអនុវត្តកន្លងមក។
លោកស្រីបន្តថា “ដើម្បីឆ្លើយតបទៅនឹងការវិវត្ត នៃបច្ចេកវិទ្យា NBC ក៏បានបន្តអភិវឌ្ឍបន្ថែមមុខងារ Contacless លើប្រព័ន្ធ CSS ដែល មានស្រាប់ក្នុងគោលបំណង សម្រួលប្រតិបត្តិការទូទាត់ឱ្យកាន់តែមានភាពងាយស្រួលមួយកម្រិតទៀត”។
ក្រៅពីនេះ ធនាគារជាតិនៃកម្ពុជា បានបន្តពង្រឹងសមត្ថភាពក្នុងការអនុវត្តមុខងារគ្រប់គ្រង និងត្រួតពិនិត្យបន្ថែមទៀត ដើម្បីធានាថា ប្រព័ន្ធទូទាត់សងប្រាក់ ដំណើរការប្រកបដោយសុវត្ថិភាព និងប្រសិទ្ធភាព ការជឿទុកចិត្តពីសាធារណជន។
លោកសុខ វឿន ប្រធានក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា បានថ្លែងថា សមាគមមីក្រូហិរញ្ញវត្ថុកម្ពុជា តែងតែជំរុញការសម្របខ្លួន និងអភិវឌ្ឍបច្ចេកវិទ្យាឌីជីថល ជាអាទិភាពស្នូលរបស់ខ្លួនដើម្បីធ្វើទំនើបកម្ម ប្រព័ន្ធហិរញ្ញវត្ថុឌីជីថល និងបង្កើនប្រសិទ្ធភាពក្នុងការផ្តល់នូវសេវាហិរញ្ញវត្ថុ ប្រកបដោយភាពងាយស្រួល ហើយនិងសុវត្ថិភាព។
លោកបានថ្លែងថា “សមាគមនឹងនៅតែបន្តចូលរួម យ៉ាងសកម្មបន្ថែមទៀត ជាមួយរដ្ឋាភិបាលលើទិសដៅ នៃការធ្វើបរិវត្តកម្មឌីជីថល នៅក្នុងសង្គមនិងសេដ្ឋកិច្ចកម្ពុជា”៕