ដោយៈ ច្រាយ ចំណាន
ភ្នំពេញៈ ធនាគារជាតិនៃកម្ពុជា និងធនាគារជាតិថៃកាលពីសប្តាហ៍មុន បានប្រកាសដាក់ឱ្យប្រើប្រាស់ជាផ្លូវការ សេវាទូទាត់ឆ្លងដែនរវាងកម្ពុជា និងថៃ ដំណាក់កាលទី២ ដែលអនុញ្ញាតឲ្យជនជាតិថៃ ដែលធ្វើដំណើរមកប្រទេសកម្ពុជា អាចស្កេនទូទាត់ទិញទំនិញ ឬសេវាកម្មផ្សេង តាមរយៈ QR បានដូចគ្នានឹងជនជាតិខ្មែរ ដែលធ្វើដំណើរទៅកាន់ប្រទេសថៃដែរ។
គិតមកទល់ពេលនេះ មានរយៈពេលជាង៣ឆ្នាំហើយ ដែលប្រទេសកម្ពុជា និងថៃ បានអនុញ្ញាតដាក់ឲ្យប្រើប្រាស់ ប្រព័ន្ធប្រតិបត្តិការទូទាត់ឆ្លងដែន តាមរយៈការស្កេនQR ដែលធ្វើឲ្យអ្នកប្រើប្រាស់ អេស៊ីលីដាម៉ូបាល នៅកម្ពុជា អាចស្កេនទូទាត់នៅក្នុងប្រទេសថៃ បានរហូតដល់៥២លានរៀល នៅក្នុងមួយថ្ងៃៗ រីឯចំនួនប្រតិបត្តិការទូទាត់ក្នុងមួយថ្ងៃ គឺមិនត្រូវបានកំណត់នោះទេ។
បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី មានប្រសាសន៍ថា ចាប់តាំងពីធនាគារ អេស៊ីលីដា ភីអិលស៊ី ត្រូវបានអនុញ្ញាតដោយ ធនាគារជាតិនៃកម្ពុជា សម្រាប់ការដាក់ឲ្យប្រើប្រាស់ប្រព័ន្ធ ប្រតិបត្តិការទូទាត់ឆ្លងដែន ជាមួយប្រទេសថៃ កាលពីថ្ងៃទី១៨ ខែកុម្ភៈ ឆ្នាំ២០២០ មក ប្រតិបត្តិការទូទាត់ឆ្លងដែន រវាងប្រទេសទាំងពីរ មានការកើនឡើងគួរឲ្យកត់សម្គាល់។
លោកបន្តថា ដោយសារអ្នកប្រើប្រាស់ អេស៊ីលីដាម៉ូបាល អាចស្កេនQR ទូទាត់ថ្លៃទំនិញ និងសេវាកម្មនានា គ្រប់ទីកន្លែងនៅក្នុងប្រទេសថៃ បានរហូតដល់ទៅ៥២លានរៀល ក្នុងមួយថ្ងៃ (កាត់ពីគណនីវ៉លឡេត៖១២លានរៀល និងគណនីធនាគារ៖ ៤០លានរៀល)។
គិតចាប់ពីខែកុម្ភៈ ឆ្នាំ២០២០ ដល់ខែឧសភា ឆ្នាំ២០២៣ ចំនួនប្រតិបត្តិការទូទាត់ មានដល់ទៅ ៩.៥៥៥ និងមានទំហំទឹកប្រាក់សរុបប្រមាណ ២៧លានបាត។
លោកបណ្ឌិតបន្តថា ឥទ្បូវនេះកម្ពុជា បានទទួលការស្កេនទូទាត់ពីអតិថិជននៃធនាគារពីប្រទេសថៃ មកស្កេននៅលើ KHQR ជាប្រាក់រៀល របស់ពាណិជ្ជករ (អ្នកលក់) ធនាគារនីមួយៗនៅកម្ពុជា ដែលជាសមាជិក Bakong បានហើយ ដែលបច្ចុប្បន្នសមាជិករបស់ Bakong មានចំនួនសរុប ៤៨ ធនាគារ-ស្ថាប័នហិរញ្ញវត្ថុ។
លោកបញ្ជាក់បន្ថែមទៀតថា ដើម្បីអាចស្កេនទូទាត់ឆ្លងដែនពីកម្ពុជានៅប្រទេសថៃបាន អតិថិជនត្រូវមានគណនីជាប្រាក់រៀល ហើយពាណិជ្ជករថៃ (អ្នកលក់) ត្រូវមានស្លាកសញ្ញា ThaiQR/PromptPay របស់ធនាគារចំនួនប្រាំនៅប្រទេសថៃ មានដូចជា៖ Kasikorn Bank, KrungThai Bank, Bangkok Bank, Bank of Ayudhya និង Siam Commercial Bank។
លោកបានបញ្ជាក់បន្តទៀតថា នៅប្រទេសកម្ពុជា មានធនាគារទំនាក់ទំនង (Sponsoring Banks) ចំនួនបី ដូចជា៖ ធនាគារ អេស៊ីលីដា ភីអិលស៊ី ធនាគារកម្ពុជាពាណិជ្ជ និងធនាគារពាណិជ្ជកម្មក្រៅប្រទេសនៃកម្ពុជា សម្រាប់គាំទ្រអតិថិជន ធ្វើប្រតិបត្តិការស្កេនទូទាត់ឆ្លងដែន ទៅមករវាងប្រទេសកម្ពុជា និងប្រទេសថៃ។
ចំពោះកម្រៃសេវា សម្រាប់ប្រតិបត្តិការស្កេនទូទាត់ឆ្លងដែន រវាងខែ្មរ ស្កេន ថៃ និង ថៃ ស្កេន ខ្មែរ គឺមិនគិតថ្លៃសេវាឡើយ៕
