ដោយ: គង់ លាងហួរ
ភ្នំពេញ: យោងតាមរបាយការណ៍ចេញផ្សាយថ្មីៗនេះរបស់ធនាគារជាតិនៃកម្ពុជា (NBC) បានឱ្យដឹងថា ការទូទាត់តាមប្រព័ន្ធទូរស័ព្ទមានការកើនឡើងគួរឱ្យកត់សម្គាល់នៅកម្ពុជា ខណៈដែលមនុស្សកាន់តែច្រើនផ្លាស់ប្តូរពីការប្រើប្រាស់សាច់ប្រាក់ទៅជម្រើសប្រតិបត្តិការឌីជីថល។
និន្នាការនៃការប្រើប្រាស់សេវាទូទាត់បានកើនឡើងគួរឱ្យកត់សម្គាល់ ដោយសារអាកប្បកិរិយារបស់អតិថិជនបានផ្លាស់ប្តូរពីសាច់ប្រាក់ឆ្ពោះទៅរកការទូទាត់តាមឌីជីថល។
ចំនួនគណនីកាបូបអេឡិចត្រូនិកដែលបានចុះឈ្មោះបានកើនឡើងដល់១៩,៥លានគណនី ហើយចំនួនប្រតិបត្តិការសរុបបានកើនឡើងពី៧០៨លានដល់១ពាន់លាន ជាមួយនឹងចំនួនទឹកប្រាក់សរុប២៧២,៨ពាន់លានដុល្លារអាមេរិក ឬស្មើប្រហែល៩ដងនៃផលិតផលក្នុងស្រុកសរុប (GDP)របស់កម្ពុជា។
ស្ថាប័នសេវាទូទាត់ប្រាក់ (PSI) ចំនួន៣៥ត្រូវបានផ្តល់អាជ្ញាប័ណ្ណ ហើយគ្រឹះស្ថានធនាគារ និងហិរញ្ញវត្ថុ (BFI) ចំនួនពីរត្រូវបានអនុញ្ញាតឱ្យដំណើរការអាជីវកម្មទូទាត់នៅចុងឆ្នាំ២០២២កន្លងទៅ។
ជាទូទៅផលិតផល និងសេវាកម្មដែលផ្តល់ដោយស្ថាប័នទាំងនេះគឺស្ថិតនៅក្នុងទម្រង់នៃការទូទាត់ឌីជីថល ដែលអាចដំណើរការបានតាមរយៈកម្មវិធីទូរស័ព្ទ ឬនៅភ្នាក់ងារទូទាត់ផ្សេងៗ និងបណ្តាញផ្សេងទៀត។
ប្រធាននាយកប្រតិបត្តិរបស់ធនាគារប្រៃសណីយ៍កម្ពុជា លោក តូច ចៅចេក បានឱ្យដឹងនៅថ្ងៃព្រហស្បតិ៍នេះថា សេវាទូទាត់ប្រាក់តាមទូរស័ព្ទទទួលបានសន្ទុះខ្លាំងក្នុងរយៈពេលប៉ុន្មានឆ្នាំចុងក្រោយនេះ ដោយសារជំងឺរាតត្បាតកូវីដ-១៩។
លោក តូច ចៅចេក បានប្រាប់សារពត៌មាន Xinhua ថា “ចាប់តាំងពីមានការផ្ទុះនៃជំងឺរាតត្បាត យើងឃើញថាមនុស្សកាន់តែច្រើនឡើងបានប្តូរទៅប្រើប្រាស់ការទូទាត់តាមឌីជីថលក្នុងជីវិតប្រចាំថ្ងៃ ខណៈដែលស្ថាប័នហិរញ្ញវត្ថុជាច្រើនបាននិងកំពុងកែលម្អប្រព័ន្ធទូទាត់ឌីជីថលរបស់ពួកគេ” ។
លោក តូច ចៅចេក បានបន្ថែមថា គិតរហូតមកដល់ពេលនេះ មានគណនីកាបូបអេឡិចត្រូនិកជាង២០ម៉ឺនគណនីត្រូវបានចុះបញ្ជីក្រោមធនាគារប្រៃសណីយ៍កម្ពុជា៕
