ដោយ: គង់ លាងហួរ
ភ្នំពេញ: អគ្គនាយកដ្ឋានពន្ធដារ (GDT) នៃក្រសួងសេដ្ឋកិច្ច និងហិរញ្ញវត្ថុកម្ពុជា ប្រមូលចំណូលពន្ធបានជិត១,៦ពាន់លានដុល្លារនៅក្នុងរយៈពេល៤ខែ ដើមឆ្នាំ២០២៣នេះ ដែលស្មើទៅនឹង៤៤ភាគរយនៃគោលដៅប្រចាំឆ្នាំ។
តួលេខនេះត្រូវបានចេញផ្សាយ ដោយអគ្គនាយកនៃអគ្គនាយកដ្ឋានពន្ធដារ (GDT) លោក គង់ វិបុល នៅក្នុងការផ្សាយពិសេសស្តីពីសេវាពន្ធកាលពីពេលថ្មីៗនេះ។
ការប្រមូលប្រាក់ចំណូលពីប្រតិបត្តិការ ពាណិជ្ជកម្មអេឡិចត្រូនិកសម្រាប់រយៈពេលពីខែមករា ដល់ខែមេសាឆ្នាំ២០២៣នេះ ត្រូវបានកត់ត្រាចំនួន២៦លានដុល្លារ។
លោក គង់ វិបុល បានពន្យល់ពីចំណូលពន្ធសំខាន់់ៗ ក្នុងរយៈពេល៤ខែដំបូង តាមរយៈស្ថានភាពចំណូលពន្ធខ្ពស់ នៅក្នុងខែមករាដល់ខែមីនាឆ្នាំ២០២៣ ដែលជារដូវកាលសម្រាប់ប្រកាស និងបង់ពន្ធលើប្រាក់ចំណូលសម្រាប់ឆ្នាំ២០២២។
ទន្ទឹមនឹងនេះដែរ លោក គង់ វិបុល បានចាត់ទុកសមិទ្ធផលដ៏ល្អប្រសើរនេះថា បណ្តាលមកពីវិធានការ ដ៏មានប្រសិទ្ធភាពរបស់រដ្ឋាភិបាលកម្ពុជា ដើម្បីទប់ទល់ប្រឆាំងនឹងជំងឺរាតត្បាតកូវីដ-១៩។
អគ្គនាយកដ្ឋានពន្ធដារ (GDT) គឺជាភ្នាក់ងាររដ្ឋាភិបាលដែលទទួលខុសត្រូវ ក្នុងការប្រមូលពន្ធផ្ទៃក្នុងដូចជា ពន្ធលើប្រាក់ចំណូល ពន្ធលើប្រាក់ខែ អាករលើតម្លៃបន្ថែម និងពន្ធអចលនទ្រព្យ។
នៅឆ្នាំ២០២៣នេះ រដ្ឋាភិបាលកំណត់គោលដៅប្រមូលថវិកាឱ្យបានចំនួន២៣ពាន់ពាន់លានរៀល (ប្រហែល៥,៥ពាន់លានដុល្លារ) ជាប្រាក់ចំណូលពី GDT និងអគ្គនាយកដ្ឋានគយ និងរដ្ឋាករ ដែលប្រមូលពន្ធទៅលើទំនិញនាំចូល និងទំនិញនាំចេញពីប្រទេស៕
