ដោយៈ ម៉ាលីនណា
ភ្នំពេញៈ លោកសាបូ អូហ្សាណូ រដ្ឋលេខាធិការក្រសួងបរិស្ថាន បានដឹកនាំគណៈប្រតិភូកម្ពុជា ចូលរួមកិច្ចប្រជុំសនិ្នសីទភាគីលើកទី១៦ នៃអនុសញ្ញាបាសែល ស្តីពីការត្រួតពិនិត្យចលនាដឹកជញ្ជូន និងការបោះបង់ចោលសំណល់គ្រោះថ្នាក់ឆ្លងដែន(BC COP16) កិច្ចប្រជុំសន្និសីទភាគីលើកទី១១ នៃអនុសញ្ញារ៉ូថឺដាមស្តីពី នីតិវិធីនៃការយល់ព្រមផ្តល់ព័ត៌មានជាមុន ចំពោះសារធាតុគីមី និងថ្នាំកសិកម្មគ្រោះថ្នាក់ក្នុងពាណិជ្ជកម្មអន្តរជាតិ (RC COP11)។
លោកក៏បានចូលរូម កិច្ចប្រជុំសន្និសីទភាគីលើកទី១១ នៃអនុសញ្ញាស្ដុកខូម ស្តីពីសារធាតុបំពុលសរីរាង្គមិនងាយបំបែកធាតុ (SC COP11) ដែលរៀបចំឡើងនៅទីក្រុងហ្សឺណែវ ប្រទេសស្វីស។ គណៈប្រតិភូបាននិងកំពុងចូលរូមកិច្ចប្រជុំ ចាប់ពីថ្ងៃទី០១ ដល់ថ្ងែទី១២ ខែ ឧសភា ឆ្នាំ២០២៣។
កិច្ចប្រជុំសន្និសីទភាគីនៃអនុសញ្ញាបាស៊ែល រ៉ូតាថឺដាម និងស្តុកខូម បានរៀបចំក្រោមប្រធានបទក្រោមប្រធានបទ “ការពន្លឿនគោលដៅគ្រប់គ្រងសារធាតុគីមី និងសំណល់ប្រកបដោយសុវត្ថិភាពបរិស្ថាន» ដែលមានអ្នកចូលរួមចំនួន១៤០០ តំណាងអោយប្រទេសជាភាគីចំនួន១៨២ និងអង្គការអន្តរជាតិជាអ្នកអង្កេតការណ៍”។
គោលបំណងសំខាន់នៃកិច្ចប្រជុំសន្និសីទភាគី នៃអនុសញ្ញាទាំងបីនេះ រួមមាន ទី១ ពិនិត្យលើការវឌ្ឍនភាព និងបញ្ហាប្រឈមក្នុងការអនុវត្តអនុសញ្ញាទាំងបី ដើម្បីស្វែងរកដំណោះស្រាយសំដៅជួយដល់ប្រទេសជាភាគី។ ទី២ ពិភាក្សា និងសម្រេចលើសេចក្តីសម្រេច និងសំេណើកែសម្រួលមាត្រាមួយចំនួន ដែលបានរៀបចំដោយក្រុមការងារបច្ចេកទេស និងបានស្នើឡើងដោយប្រទេសជាភាគី ដើម្បីលើកកម្ពស់ប្រសិទ្ធិភាព ក្នុងការអនុវត្តអនុសញ្ញាសំដៅសឆ្លើយតបទៅនឹងគោលដៅដែលបានកំណត់។
ទី៣ ពិនិត្យ និងពិភាក្សាលើការរៀបចំផែនការសកម្មភាព និងថវិកាសម្រាប់ឆ្នាំ ២០២៤ និង២០២៧ ។
ជាមួយគ្នានេះដែរ លោករដ្ឋលេខាធិការ បានជួបពិភាក្សាការងារជាមួយ ឯកឧត្តម Rolph Payet អគ្គលេខាធិកានៃអនុសញ្ញាបាស៊ែល អនុសញ្ញារ៉ូថឺដាម និងអនុសញ្ញាស្តុកខូម (BRS)ដោយក្នុងនោះឯកឧត្តមរដ្ឋលេខាធិការបានលើកឡើង អំពីគោលជំហរនិងការប្តេជ្ញាចិត្តរបស់កម្ពុជា ក្នុងការចូលរួមជាមួយសហគមន៍អន្តរជាតិ លើការងារកិច្ចគាំពារបរិស្ថាន និងការពារសុខភាពសាធារណះ តាមរយះការផ្តល់សច្ចាប័នចូលជាភាគី និងបំពេញកាតព្វកិច្ច ដែលបានកំណត់នៅក្នុងកិច្ចព្រមព្រៀងពហុភាគីវិស័យបរិស្ថាន រួមមានការរៀបចំលិខិតបទដ្ឋានគតិយុត្តពាក់ពន្ធ័ ការពង្រឹងសមត្ថភាពមន្រ្តី និងការរៀបចំកម្មវិធីផ្សព្វផ្សាយនិងលើកកម្ពស់ ការយល់ដឹងសាធារណៈពាក់ពន្ធ័នឹងសារធាតុសំណល់គ្រោះថ្នាក់៕