ដោយ: គង់ លាងហួរ
ភ្នំពេញ: យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា នៅក្នុងរយៈពេលពីរខែដំបូងនៃឆ្នាំ២០២៣នេះ ប្រទេសកម្ពុជាបាននាំចេញគ្រាប់ស្វាយចន្ទីចំនួន១៤.១៩៣តោនទៅកាន់បណ្តាប្រទេសចំនួន៤។
ក្នុងនោះស្វាយចន្ទីចំនួន១១៤.១៤០តោនត្រូវបាននាំចេញទៅកាន់ប្រទេសវៀតណាម ២៧តោនទៅប្រទេសជប៉ុន ២០តោនទៅប្រទេសថៃ និង៦,៤តោន ទៅកាន់ប្រទេសកូរ៉េខាងត្បូង។
លើសពីនេះទៀត កម្ពុជាក៏បានប្តេជ្ញាផលិតគ្រាប់ស្វាយចន្ទីប្រកបដោយគុណភាពប្រកួតប្រជែងលើទីផ្សារជាតិ និងអន្តរជាតិផងដែរ។ ស្វាយចន្ទីជាដំណាំពាណិជ្ជកម្មនាំចេញច្រើនជាងគេទី៣របស់កម្ពុជា បន្ទាប់ពីអង្ករឈរលេខ១ និងទី២ គឺដំឡូងមី។
លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កំពុងសហការជាមួយតួអង្គសំខាន់ៗដូចជា សហព័ន្ធ និងសមាគមស្វាយចន្ទីកម្ពុជា ក្រសួងពាណិជ្ជកម្ម និងធនាគារអភិវឌ្ឍន៍ជនបទ និងកសិកម្ម ដើម្បីជំរុញការនាំចេញគ្រាប់ស្វាយចន្ទីរបស់កម្ពុជា។
បច្ចុប្បន្ននេះ កម្ពុជាអាចផលិតគ្រាប់ស្វាយចន្ទីបានរហូតដល់ទៅ១.១៨០.០០០តោន ពីផ្ទៃដី៧០០.០០០ហិកតានៅទូទាំងប្រទេស។
នៅក្នុងខែមករា ឆ្នាំ២០២៣ កម្ពុជាបានអនុម័តសេចក្តីព្រាងគោលនយោបាយជាតិស្តីពីគ្រាប់ស្វាយចន្ទីឆ្នាំ២០២២-២០២៧ ដោយបញ្ជាក់ឡើងវិញនូវការប្តេជ្ញាចិត្តរបស់ខ្លួនក្នុងការប្រែក្លាយខ្លួនទៅជាអ្នកផលិត និងផ្គត់ផ្គង់គ្រាប់ស្វាយចន្ទីដ៏សំខាន់នៅក្នុងទីផ្សារក្នុងស្រុក តំបន់ និងពិភពលោក៕