ដោយ: គង់ លាងហួរ
ភ្នំពេញ: ក្រុមជំនាញផ្នែកហិរញ្ញវត្ថុ និងឯកជន បានអះអាងថា ការដកកម្ពុជាចេញនាពេលថ្មីៗនេះ ពីបញ្ជីពណ៌ប្រផេះនៃការលាងលុយកខ្វក់ ដោយក្រុមការងារកិច្ចការហិរញ្ញវត្ថុ (FATF) គឺជាភាពចាំបាច់ទាំងស្រុង សម្រាប់វិស័យហិរញ្ញវត្ថុរបស់កម្ពុជា ហើយវានឹងជួយបង្កើននិងទាក់ទាញទំនុកចិត្ត របស់វិនិយោគិនមកបណ្តាក់ទុននៅកម្ពុជា។
លោកអ៊ិន ចាន់នី ប្រធាន និងជានាយកគ្រប់គ្រងធនាគារអេស៊ីលីដា បានមានប្រសាសន៍ថា “ចំណាត់ការនេះឆ្លុះបញ្ចាំងពីកិច្ចខិតខំប្រឹងប្រែងរបស់រដ្ឋាភិបាល ឆ្ពោះទៅរកការបញ្ចប់នោះ ដើម្បីពង្រឹងសមត្ថភាពខ្លួន ក្នុងការប្រយុទ្ធប្រឆាំងនឹងឧក្រិដ្ឋកម្ម លាងលុយកខ្វក់នៅកម្ពុជា”។ លោកបន្ថែមថា “ការចាកចេញពីបញ្ជីពណ៌ប្រផេះមិនត្រឹមតែលើកកំពស់មុខមាត់របស់កម្ពុជា នៅលើឆាកអន្តរជាតិប៉ុណ្ណោះទេ ប៉ុន្តែថែមទាំងទាក់ទាញការវិនិយោគពីបរទេស និងជួយសម្រួលដល់ពាណិជ្ជកម្មរបស់អ្នកវិនិយោគក្នុងស្រុក និងអន្តរជាតិលើគ្រប់វិស័យផងដែរ”។
ជាមួយគ្នានេះ លោកកាំង តុងងី អ្នកនាំពាក្យសមាគមមីក្រូហិរញ្ញវត្ថុកម្ពុជា (CMA) មានប្រសាសន៍ថា “វាជារឿងល្អ និងសំខាន់សម្រាប់វិស័យហិរញ្ញវត្ថុរបស់កម្ពុជា ព្រោះវានឹងផ្តល់ភាពងាយស្រួលបន្ថែមទៀតដល់វិនិយោគិនបរទេស ដែលត្រូវការផ្ទេរប្រាក់ទៅកាន់ប្រទេសកម្ពុជា”។
លោកបានអះអាងថា គោលនយោបាយរបស់កម្ពុជា គឺបើកចំហការលើកទឹកចិត្តដល់ការវិនិយោគបរទេស ប៉ុន្តែជាអកុសលនៅឆ្នាំ២០១៩ ប្រទេសនេះត្រូវបានដាក់ក្នុងបញ្ជីពណ៌ប្រផេះ ដែលធ្វើឱ្យវិនិយោគិនបរទេសប្រឈមនឹងការលំបាកមួយចំនួន។
ទោះជាយ៉ាងណាក្តី ចាប់ពីពេលនេះទៅលំហូរវិនិយោគបរទេសនៅកម្ពុជាគួរតែប្រសើរឡើង។
ជាមួយគ្នានេះ អនុប្រធានសភាពាណិជ្ជកម្មកម្ពុជា (CCC) លោកឧកញ៉ា លឹម ហេង បានមានប្រសាសន៍ថា “វិស័យឯកជនមានការរីករាយយ៉ាងខ្លាំង ចំពោះការដកកម្ពុជាចេញពីបញ្ជីប្រផេះនេះ ដោយសារអ្នកធុរកិច្ច ក៏មានការព្រួយបារម្ភអំពីបញ្ហានេះផងដែរ”។
លោកឧកញ៉ាបានសង្កត់ធ្ងន់ថា នាពេលបច្ចុប្បន្ននេះ កម្ពុជាជាអ្នកនាំចេញដ៏សំខាន់ ជាពិសេសផលិតផលកសិកម្មសម្រាប់កែច្នៃ ខណៈការនាំចូលក៏មានកម្រិតខ្ពស់ផងដែរ ដូច្នេះហើយយើងមានប្រតិបត្តិការទូទាត់ប្រាក់ជាច្រើន រវាងវិនិយោគិនក្នុងស្រុក និងបរទេសជាប្រាក់ដុល្លារ។
លោកបានបន្ថែមថា “វាក៏ជាដំណឹងដ៏ល្អ សម្រាប់ក្រុមអ្នកវិនិយោគ ហើយវានឹងផ្តល់ឱ្យពួកគេនូវទំនុកចិត្ត និងភាពងាយស្រួលក្នុងការវិនិយោគនៅក្នុងប្រទេសកម្ពុជាផងដែរ”។
ចំណែកលោកបណ្ឌិតគី សេរីវឌ្ឍន៍ អ្នកជំនាញផ្នែកសេដ្ឋកិច្ចនៃរាជបណ្ឌិតសភាកម្ពុជាបានមានប្រសាសន៍ថា “នៅពេលដែលប្រទេសកម្ពុជាស្ថិតក្នុងបញ្ជីពណ៌ប្រផេះ វាបានធ្វើឱ្យវិនិយោគិនបរទេសស្ទាក់ស្ទើរចិត្ត ដើម្បីមកបណ្តាក់ទុននៅកម្ពុជា ពីព្រោះពួកគេខ្លាចការរឹតបន្តឹងពាណិជ្ជកម្ម និងដំណើរការពិបាក សម្រាប់ប្រតិបត្តិការហិរញ្ញវត្ថុ”។
លោកបណ្ឌិតបង្ហាញនូវការជឿជាក់ថា “ការដកប្រទេសកម្ពុជាចេញពីបញ្ជីប្រផេះ នឹងធ្វើឱ្យកម្ពុជាកាន់តែមានភាពទាក់ទាញ ដល់ក្រុមវិនិយោគិនបរទេស ដែលមានបំណងចង់វិនិយោគ នៅក្នុងប្រទេសកម្ពុជា”៕