ដោយ: គង់ លាងហួរ
ភ្នំពេញ: បណ្តាប្រទេសអឺរ៉ុប បានក្លាយជាអ្នកទិញអង្ករកម្ពុជាដ៏ធំនៅក្នុងខែមករា ឆ្នាំ២០២៣នេះ ខណៈកម្ពុជាកំពុងរំពឹងថា នឹងមានការកើនឡើង នៃការនាំចេញអង្កររបស់ខ្លួននៅឆ្នាំ២០២៣នេះ។
លោកឧកញ៉ាចាន់ សុខឃាំង ប្រធានសហព័ន្ធស្រូវអង្ករកម្ពុជា (CRF) បានបញ្ជាក់ថា “យើងរំពឹងថា នឹងមានការកើនឡើងប្រហែល៣៥ ទៅ៤០ភាគរយ នៃការនាំចេញអង្ករទៅកាន់ទីផ្សារអឺរ៉ុបនៅឆ្នាំ២០២៣”។
បណ្តាប្រទេសចំនួន២០ នៅអឺរ៉ុបគ្របដណ្តប់ប្រហែល៤៨ភាគរយនៃអង្ករសរុបដែលកម្ពុជាបាននាំចេញ កាលពីខែមករាកន្លងទៅ។ បណ្តាប្រទេសទាំងនោះ បាននាំចូលអង្ករពីកម្ពុជា ចំនួន១៧.៧៩៥តោន ដែលមានតម្លៃជាង១៣,៤៤លានដុល្លារ។
លោក ចាន់ សុខឃាំង បានមានប្រសាសន៍ថា “ឥឡូវនេះ ទីផ្សារអឺរ៉ុបបានចាប់ផ្តើមទទួលស្គាល់គុណភាព និងភាពស៊ីសង្វាក់គ្នានៃគុណភាពអង្ករកម្ពុជា ហើយយើងកំពុងដឹកជញ្ជូនទៅឱ្យពួកគេ”។ លោកគិតថា “បច្ចុប្បន្ននេះ ប្រជាជនអាស៊ីជាច្រើនកំពុងរស់នៅ ក្នុងបណ្តាប្រទេសអឺរ៉ុប ហើយពួកគេបានចាប់ផ្តើមចូលចិត្តអង្កររបស់កម្ពុជា”។
នៅក្នុងចំណោមបណ្តាប្រទេសនៅអឺរ៉ុប ក្នុងនោះប្រទេសបារាំងបាននាំចូលអង្ករពីកម្ពុជាចំនួន៦.១៧០តោន គិតជាទឹកប្រាក់ជាង៤,១១លានដុល្លារ ហូឡង់នាំចូល២.៣៥៧តោន តម្លៃ២,៣១លានដុល្លារ សាធារណរដ្ឋឆេក២.២៨៧តោន ចក្រភពអង់គ្លេស១.៦៦៩តោន អេស្ប៉ាញ១.១៣៧តោន អាល្លឺម៉ង់១.០៦៤តោន អុីតាលី១.០១១តោន ព័រទុយហ្គាល់៤៩៤តោននិងក្រិក៣២៣តោន។
កាលពីខែមករា កម្ពុជាបាននាំចេញអង្ករជាង៣៦.៩០០តោន ដែលមានតម្លៃប្រហែល២៨,៨៣លានដុល្លារ ទៅកាន់ទីផ្សារនៅទូទាំងពិភពលោក៕