ដោយ: គង់ លាងហួរ
ភ្នំពេញ: កម្ពុជាបាននាំចេញគ្រាប់ស្វាយចន្ទីឆៅ សរុបចំនួន៦៧ម៉ីននតោន ដែលមានតម្លៃ១,០៧ពាន់លានដុល្លារ កាលពីឆ្នាំ២០២២ទៅកាន់ទីផ្សារអន្តរជាតិ។
នៅក្នុងនោះដែរ គ្រាប់ស្វាយចន្ទីឆៅចំនួន៩៨,៥ភាគរយ របស់កម្ពុជា ដែលមានតម្លៃ១ពាន់លានដុល្លារ ត្រូវបាននាំចេញទៅកាន់ប្រទេសវៀតណាម។
ជាងនេះទៅទៀត គ្រាប់ស្វាយចន្ទីឆៅរបស់កម្ពុជា ក៏ជាប្រភពសំខាន់មួយ សម្រាប់កែច្នៃគ្រាប់ស្វាយចន្ទីនៅប្រទេសវៀតណាមផងដែរ។
យោងតាមព័ត៌មានលម្អិត ដែលបានផ្តល់ឱ្យដោយសមាគមស្វាយចន្ទីវៀតណាម (Vinacas) បានឱ្យដឹងថា វៀតណាមបាននាំចូលគ្រាប់ស្វាយចន្ទីឆៅប្រហែល១,៩លានតោន ជាមួយនឹងតម្លៃជាមធ្យម១.៤០០ដុល្លារក្នុងមួយតោន ហើយក្រុមហ៊ុនក្នុងស្រុក បានចំណាយថវិកាប្រហែល២,៦៦ពាន់លានដុល្លារលើការនាំចូលវត្ថុធាតុដើម។
ប្រទេសវៀតណាមបន្តតំណាង ឱ្យប្រទេសនាំចូលគ្រាប់ស្វាយចន្ទីឆៅនាំមុខគេនៅទូទាំងពិភពលោក ដោយមានប្រទេសផ្តល់គ្រាប់ស្វាយចន្ទីសំខាន់ៗសម្រាប់ប្រទេសនេះ រួមមានកម្ពុជា ក៏ដូចជាបណ្តាប្រទេសនៅអាហ្វ្រិកដូចជា កូតឌីវ័រ ហ្គាណា នីហ្សេរីយ៉ា និងតង់ហ្សានីផងដែរ។
បច្ចុប្បន្ន ផ្ទៃដីដាំដុះស្វាយចន្ទីវៀតណាម មានត្រឹមតែ៣០០.០០០ហិកតាតែប៉ុណ្ណោះ ដែលគ្រប់ដណ្តប់បានប្រហែល៣០ភាគរយ នៃវត្ថុធាតុដើមសម្រាប់តម្រូវការកែច្នៃរបស់អាជីវកម្មក្នុងស្រុក។
ដូច្នេះហើយ សមាគមស្វាយចន្ទីវៀតណាម បានស្នើដល់ក្រសួងកសិកម្ម និងអភិវឌ្ឍន៍ជនបទរបស់ខ្លួន ឱ្យរៀបចំផែនការរយៈពេលវែង ជាពិសេសសម្រាប់តំបន់ដាំស្វាយចន្ទី តាមរយៈការអភិវឌ្ឍន៍តំបន់សម្ភារៈ គ្រាប់ស្វាយចន្ទីទាំងនៅក្នុងប្រទេសកម្ពុជា និងភាគខាងត្បូងប្រទេសឡាវផងដែរ៕
