ដោយ: គង់ លាងហួរ
វ៉ាស៊ីនតោន: គិតចាប់ពីថ្លៃជួល និងគ្រឿងទេស រហូតដល់ឧបករណ៍ប្រើប្រាស់ គ្រួសារអាមេរិកត្រូវចំណាយប្រាក់ជាច្រើន ជារៀងរាល់ខែ ដោយសារតែអត្រាអតិផរណា។
ខណៈពេលដែលអតិផរណា បានធ្លាក់ចុះក្នុងរយៈពេលប៉ុន្មានខែថ្មីៗនេះ គ្រួសារអាមេរិក ជាធម្មតាបានចំណាយប្រាក់៣៧១ដុល្លារបន្ថែមទៀតលើទំនិញ និងសេវាកម្ម នៅក្នុងខែធ្នូ ឆ្នាំ២០២២។ នេះបើយោងតាមក្រុមហ៊ុនសេវាកម្មហិរញ្ញវត្ថុ Moody’s Analytics ។
ដំណឹងល្អគឺតម្លៃ នៃការរស់នៅហាក់បានធូរស្រាល ហើយប្រាក់ខែក៏ចាប់ផ្តើមកើនឡើងផងដែរ។
នៅក្នុងកម្រិតអតិផរណា កាលពីខែមិថុនាឆ្នាំ២០២២ គ្រួសារធម្មតាបានចំណាយប្រាក់បន្ថែម៥០២ដុល្លារ ក្នុងមួយខែ បើធៀបនឹងឆ្នាំ២០២១ នេះបើយោងតាម Moody’s ។
គ្រួសារអាមេរិកកំពុងចំណាយប្រាក់ ប្រហែល៨២,៦ដុល្លារបន្ថែមទៀតក្នុងមួយខែ លើកន្លែងស្នាក់នៅ និង៧២,០១ដុល្លារបន្ថែមទៀតលើអាហារហូបចុក។
ការិយាល័យស្ថិតិការងារបានរាយការណ៍ថា ជនជាតិអាមេរិកបានចំណាយប្រាក់១១,៨ភាគរយ លើគ្រឿងទេសច្រើនជាងឆ្នាំមុន។
តម្លៃស៊ុតបានកើនឡើងជិត៦០ភាគរយ ក្នុងរយៈពេលមួយឆ្នាំកន្លងមក ដែលជាការកើនឡើងប្រចាំឆ្នាំដ៏ខ្ពស់បំផុត ចាប់តាំងពីឆ្នាំ១៩៧៣ ដោយមួយផ្នែកបង្កឡើង ពីវិបត្តិនៃការផ្គត់ផ្គង់ដោយសារជំងឺផ្តាសាយបក្សី។
ទំនិញប្រើប្រាស់ផ្សេងទៀត ដែលធ្វើឲ្យគ្រួសារអាមេរិកចំណាយកាន់តែច្រើនក្នុងមួយខែ រួមមានឧបករណ៍ប្រើប្រាស់ ការថែទាំសុខភាព ការកម្សាន្ត និងភេសជ្ជៈមានជាតិអាល់កុល។ នេះបើយោងតាមក្រុមហ៊ុន Moody’s ។
ការរងផលប៉ះពាល់មួយចំនួនពីវិបត្តិអតិផរណា កំពុងត្រូវបានកាត់បន្ថយដោយការផ្លាស់ប្តូរ គួរឱ្យកត់សម្គាល់ក្នុងប៉ុន្មានខែថ្មីៗនេះ ខណៈប្រាក់ឈ្នួលបានកើនឡើង នៅទីបំផុតក្នុងល្បឿនលឿនជាងអតិផរណា។
ទន្ទឹមនឹងនោះ ល្បឿននៃអតិផរណាបានធ្លាក់ចុះយ៉ាងច្បាស់លាស់ ខណៈតម្លៃទំនិញប្រើប្រាស់ បានកើនឡើង៦,៥ភាគរយ ពីមួយឆ្នាំទៅមួយឆ្នាំ នៅក្នុងខែធ្នូ ដែលជាល្បឿនយឺតបំផុតចាប់តាំងពីខែតុលា ឆ្នាំ២០២១៕
