ដោយៈ ម៉ាលីនណា
ភ្នំពេញៈ កម្ពុជាប្រមូលប្រាក់បានជិត ៥៣២ លានដុល្លារពីការនាំចេញជ័រកៅស៊ូ និងឈើកៅស៊ូ ទៅកាន់ទីផ្សារអន្តរជាតិនៅឆ្នាំ ២០២២ ថយជាង ១២ ភាគរយបើធៀបឆ្នាំ ២០២១។ នេះបើតាមទិន្នន័យអគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទ។
ទិន្នន័យដដែលបានបង្ហាញថា ចាប់ពីខែមករា ដល់ដំណាច់ខែធ្នូ ឆ្នាំ ២០២២ ការនាំចេញជ័រកៅស៊ូ និងឈើកៅស៊ូ ទៅក្រៅប្រទេសមានទឹកប្រាក់សរុប៥៣១,៨៦៣លានដុល្លារ ធ្លាក់ចុះ១២,៨៤៥ភាគរយ ធៀបឆ្នាំ ២០២១ ដែលមាន ៦១០,២៨៨លានដុល្លារ។
ផ្អែកលើទិន្ន័យខាងលើ ការនាំចេញជ័រកៅស៊ូសម្រេច៣៧២, ៩០០ តោន កើនឡើង៦,៦០០តោន ស្មើនឹង២ភាគរយបើធៀបនឹងឆ្នាំ ២០២១ និងការលក់ឈើកៅស៊ូ សម្រេចបាន២៦,៤៨៩ ម៉ែត្រគុបក្នុងឆ្នាំ ២០២២ ។ ចំណែកប្រាក់ទទួលបាន គឺចំណូលពីការនាំចេញជ័រកៅស៊ូ៥២៧,៧៧៤, ៥៦៩ដុល្លារ និងឈើកៅស៊ូចំនួន៤,០៨៩,២៧៣ដុល្លារ។
អគ្គនាយកនៃអគ្គនាយកដ្ឋានកៅស៊ូ លោក ហ៊ឹម អូន បានមានប្រសាសន៍ឲ្យដឹងថា ទោះបីបរិមាណនាំចេញជ័រកៅស៊ូ និងឈើកៅស៊ូ ក្នុងឆ្នាំ ២០២២ កើនឡើងបន្តិចបន្តួចធៀបនឹងឆ្នាំ ២០២១ ប៉ុន្តែសម្រាប់ចំនួនទឹកប្រាក់ទទួលបានគឺថយចុះជាង១០ភាគរយ។
លោកពន្យល់ថា មូលហេតុនាំឱ្យទឹកប្រាក់នាំចេញធ្លាក់ចុះ គឺដោយសារការធ្លាក់ចុះតម្លៃកៅស៊ូនៅទីផ្សារអន្តរជាតិ។ លោកបន្តទៀតថា បច្ចុប្បន្នផលិតផលពីកៅស៊ូស្ទើរទាំងស្រុង គឺត្រូវបាននាំទៅទីផ្សារអន្តរជាតិ។
សម្រាប់តម្លៃកៅស៊ូ ក្នុងឆ្នាំ ២០២៣ នេះ លោក ហ៊ឹម អូនឲ្យដឹងថា ដោយសារស្ថានភាពសេដ្ឋកិច្ច ពិភពលោកនៅមិនទាន់ល្អ ជាពិសេសវិបត្តិសង្គ្រាមនៅប្រទេសអ៊ុយក្រែន ដូច្នេះតម្លៃជ័រកៅស៊ូ ក្នុងឆ្នាំ ២០២៣ នេះ អាចនឹងមានស្ថានភាពប្រហាក់ប្រហែលឆ្នាំ ២០២២៕