ដោយៈ គង់ ម៉ាលីនណា
ភ្នំពេញៈ ធនាគារអភិវឌ្ឍន៍អាស៊ី (ADB) និងទីភ្នាក់ងារបារាំងសម្រាប់ការអភិវឌ្ឍន៍ (AFD) បានផ្តល់ហិរញ្ញប្បទានចំនួន៣៨១.៤៥ លានដុល្លារអាមេរិកជាផ្លូវការដល់កម្ពុជា ដើម្បីអភិវឌ្ឍវិស័យសំខាន់ៗចំនួន៦។
នេះបើតាមពិធីចុះហត្ថលេខាលើ កិច្ចព្រមព្រៀងហិរញ្ញប្បទានសហប្រតិបត្តិការជាមួយក្រសួងសេដ្ឋកិច្ច និងហិរញ្ញវត្ថុ កាលពីសប្តាហ៍មុន។
ទន្ទឹមនឹងនេះ ដៃគូអភិវឌ្ឍន៍បានផ្តល់ជំនួយបច្ចេកទេសចំនួន១ ដែលមានទឹកប្រាក់ចំនួន១,៧លានដុលា្លរអាមេរិ សម្រាប់គាំទ្រដល់ដំណើរការអនុវត្តកម្មវិធីអភិវឌ្ឍន៍វិស័យថាមពលផងដែរ
ហិរញ្ញប្បទានសម្រាប់អភិវឌ្ឍគម្រោង និងកម្មវិធីចំនួន៦រួមមាន ដូចជា ទី១ កម្មវិធីអភិវឌ្ឍន៍វិស័យថាមពល៖ ក្នុងគោលបំណងគាំទ្រកម្ពុជាក្នុងការផ្លាស់ប្តូរទៅប្រើប្រាស់ថាមពលស្អាត ដើម្បីជំរុញកំណើនសេដ្ឋកិច្ច ឱ្យក្លាយជាសេដ្ឋកិច្ចបៃតង និងកាត់បន្ថយការបញ្ចេញកាបូន។ ទី២ គម្រោងជលផលសមុទ្រ និងតំបន់ឆ្នេរប្រកបដោយចីរភាព៖ មានគោលបំណងអភិវឌ្ឍស្ថាប័ន និងហេដ្ឋារចនាសម្ព័ន្ធតំបន់សមុទ្រ ដើម្បីលើកកម្ពស់ផលិតភាពផលនេសាទសមុទ្រ។
ទី៣ គម្រោងសុខភាពសត្វឆ្លងកាត់ព្រំដែន និងការជំរុញខ្សែច្រវាក់តម្លៃសត្វ៖ មានគោលបំណង២ រួមាន ទី១.លើកកម្ពស់ផលិតភាព គុណភាព ពាណិជ្ជកម្ម ពិពិតកម្ម និងពង្រីកការចិញ្ចឹមសត្វ និងកែច្នៃផលិតផលបស្សសត្វស្រប និងទី២.លើកកម្ពស់សុខភាពបសុសត្វ និងពង្រីកហេដ្ឋារចនាសម្ព័ន្ធខ្សែច្រវាក់តម្លៃ។
ទី៤ ប្រកបដោយភាតរៈបរិស្ថាន។ ទី៥ គម្រោងសុខភាពតាមតំបន់ព្រំដែនក្នុងមហាអនុតំបន់មេគង្គ៖ មានគោលបំណងលើកកម្ពស់ការទទួលបាន សេវាសុខាភិបាលរបស់ប្រជាជន ដែលរស់នៅតាមព្រំដែន និងប្រជាជនចំណាកស្រុកឆ្លងកាត់ព្រំដែនមួយចំនួន។ កម្មវិធីអភិវឌ្ឍន៍វិស័យពាណិជ្ជកម្ម និងការប្រកួតប្រជែង៖ មានគោលបំណងជំរុញប្រសិទ្ធភាព ពាណិជ្ជកម្ម និងភាពប្រកួតប្រជែងនៅកម្ពុជា។
ទី៦ គម្រោងវិទ្យាសាស្ត្រ និងបច្ចេកវិទ្យាសម្រាប់ការអប់រំកម្រិតមធ្យមសិក្សា៖ មានគោលបំណងលើកកម្ពស់ គុណភាព និងប្រសិទ្ធភាពការអប់រំថ្នាក់មធ្យមសិក្សាទុតិយភូមិ ដោយផ្តោតជាចម្បងលើកត្តាចំនួន ៣ មានជាអាទិ៍ ទី១ ការពង្រីកវិសាលភាពនៃការអប់រំកម្រិតមធ្យមសិក្សាទុតិយភូមិតាមស្ដង់ដារ និងប្រកបដោយសមធម៌, ទី២.ការពង្រឹងគុណភាព នៃការអប់រំវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា និង ទី៣ ការលើកកម្ពស់ស្ថាប័នក្នុងការធ្វើផែនការ ការគ្រប់គ្រង និងការបង្រៀន៕
