ប្រទេសកម្ពុជាកំណត់គោលដៅទាក់ទាញភ្ញៀវទេសចរអន្តរជាតិ៣លាននាក់នៅក្នុងឆ្នាំ២០២៣

ដោយ៖ សុផារី

ភ្នំពេញ៖ កម្ពុជាអាចនឹងទទួលបានទេសចរអន្តរជាតិច្រើនជាង​៣លាននាក់ ខណៈ​ពេញ​មួយឆ្នាំ២០២២នេះ​ កម្ពុជារំពឹងថា​នឹងទទួលបានទេសចរអន្តរជាតិច្រើនជាង២,២លាននាក់ និងទេសចរផ្ទៃក្នុង ច្រើនជាង១៣លាននាក់។

នៅក្នុងពិធីបិទសិក្ខាសាលាផ្សព្វផ្សាយសមិទ្ធផល នៃការអនុវត្តកម្មវិធីពង្រឹងសមត្ថភាពពាណិជ្ជកម្ម​ក្នុងវិស័យទេសចរណ៍ នៅថ្ងៃទី២២ ធ្នូ ឆ្នាំ២០២២ លោក ថោង ខុន រដ្ឋមន្រ្តីក្រសួង​ទេសចរណ៍ បានលើកឡើងថា​ ការរំពឹងទុករបស់កម្ពុជានឹងអាចទទួលបាន​ទេសចរ​អន្តរជាតិច្រើនជាង៣លាននាក់ នៅក្នុងឆ្នាំ២០២៣ខាងមុខនេះ គឺដោយសារជាឆ្នាំដែល​កម្ពុជានឹងធ្វើជាម្ចាស់ផ្ទះព្រឹត្តិការណ៍កីឡាស៊ីហ្គេម-អាស៊ានប៉ារ៉ាហ្គេម លើកទី៣២ ឆ្នាំ២០២៣។

លោករដ្ឋមន្រ្តី ​បានលើកឡើងបន្ត ជាចក្ខុវិស័យ ការអភិវឌ្ឍវិស័យទេសចរណ៍កម្ពុជា ត្រូវផ្អែកជា​ចំបង​លើសក្តានុពលដែលយើងមាន ដូចជា កត្តាធនធានវប្បធម៌ និងធម្មជាតិ កត្តាភូមិសាស្រ្ត និងកត្តាប្រជាសាស្រ្ត ជាមួយនឹងការគិតគូរជាប់ជាប្រចាំពីការប្រែប្រួលឥតឈប់​ឈរ​នៃ​តម្រូវការ​របស់ភ្ញៀវទេសចរជាតិ ​និងអន្តរជាតិ ​ព្រមទាំងការវិវត្តយ៉ាងឆាប់​រហ័សនៃបរិបទសេដ្ឋកិច្ច-សង្គម ដែល​មានទាំងកាលានុវត្តភាពថ្មី និងបញ្ហាប្រឈមថ្មី។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

លោក ថោង ខុន បានអំពាវនាវបន្ថែមដែរ​ ទៅដល់គ្រប់ក្រសួង-ស្ថាប័ន អាជ្ញាធរគ្រប់លំដាប់ថ្នាក់, រដ្ឋបាលថ្នាក់​ក្រោមជាតិ វិស័យឯកជន ប្រជាពលរដ្ឋ និងភ្ញៀវទេសចរ ព្រមទាំងគ្រប់ភាគី​ពាក់ព័ន្ធ​ទាំងអស់ ឲ្យបន្តចូលរួមគាំទ្រដល់កិច្ចខិតខំប្រឹងប្រែងក្នុងការ​ស្តារវិស័យទេសចរណ៍កម្ពុជា ឆ្ពោះទៅ​រកភាពរីកចម្រើនរុងរឿងនៃ “កម្ពុជា៖ ព្រះរាជាណាចក្រអច្ឆរិយៈ ផ្តល់ភាពកក់ក្តៅ”។

ក្នុងរយៈពេល១១ខែ ឆ្នាំ២០២២នេះ កម្ពុជាទទួលបានភ្ញៀវទេសចរអន្តរជាតិ​ប្រមាណ​ជាង១,៩១លាននាក់ កើនឡើងជាង ១ពាន់ភាគរយ ធៀបនឹងរយៈពេលដូចគ្នាឆ្នាំ២០២១។ រីឯភ្ញៀវទេសចរផ្ទៃក្នុងធ្វើដំណើរកម្សាន្តក្នុងប្រទេសមានភ្ញៀវទេសចរជាតិ​មានចំនួនជាង១១,៦៥​លាននាក់ កើនឡើងក្នុងអត្រា ១៨១% ធៀបរយៈពេលដូចគ្នាឆ្នាំ២០២១ និងភ្ញៀវទេសចរ​បរទេសផ្ទៃក្នុង ជាង១,៦៤លាននាក់ កើនឡើងក្នុងអត្រា៦០២% ធៀបរយៈពេលដូចគ្នាឆ្នាំ២០២១៕

LEAVE A REPLY

Please enter your comment!
Please enter your name here