ដោយៈ សុខុម
ហាណូយ: ប្រទេសវៀតណាម បានកំណត់គោលដៅបង្កើនទ្វេដងនូវការវិនិយោគរបស់បរទេស ក្នុងវិស័យកសិកម្មឱ្យឈានរហូត ដល់ទៅ៣៤ពាន់លានដុល្លារអាមេរិក នៅត្រឹមដំណាច់ឆ្នាំ២០៣០។ នេះបើយោងតាមសារព័ត៌មាន Vietnam News ចុះផ្សាយកាលពីសប្ដាហ៍កន្លងទៅ។
ទោះជាយ៉ាងណា ក្រុមអ្នកបង្កើតគោលនយោបាយ និងអ្នកជំនាញខាងឧស្សាហ៍កម្មលើកឡើងថា មានចំណុចខ្សោយ និងចំណុចរឹតត្បិតមួយចំនួនដែលប្រទេសវៀតណាម ចាំបាច់ត្រូវដោះស្រាយបន្ទាន់ ដើម្បីអាចសម្រេចគោលដៅនោះបាន។
លោកស្រី Tạ Thu Trang អ្នកជំនាញមកពីវិទ្យាស្ថានគោលនយោបាយ និងយុទ្ធសាស្ត្រ (Institute for Policy and Strategy) ដែលស្ថិតក្រោមចំណុះក្រសួងកសិកម្ម និងអភិវឌ្ឍន៍ជនបទលើកឡើងថា វិស័យកសិកម្មរបស់វៀតណាម មានការរីកចម្រើនខ្លាំងគួរឱ្យកត់សម្គាល់ ក្នុងរយៈពេលប៉ុន្មានទសវត្សរ៍ចុងក្រោយនេះ។
ចាប់ពីឆ្នាំ២០១០-២០២០ វិស័យកសិកម្មរបស់វៀតណាម រក្សាបាននូវអត្រាកំណើនប្រចាំឆ្នាំជាមធ្យម២,៨៣% ដែលស្មើរហូតដល់១២%នៃការនាំចេញអង្ករសរុបរបស់ពិភពលោកទាំងមូល។
វិនិយោគិនបរទេស បានដើរតួនាទីយ៉ាងសំខាន់ ដែលជួយឱ្យប្រទេសនេះទទួលបានភាពជោគជ័យ នៅក្នុងការធ្វើទំនើបកម្មវិស័យកសិកម្មរបស់ខ្លួន តាមរយៈការដាក់ឱ្យប្រើប្រាស់នូវបច្ចេកវិទ្យាទំនើបៗ និងបង្កើតការងារម៉ឺនសែនកន្លែង។
ទោះជាយ៉ាងណា វិស័យនេះនៅមានសក្តានុពលជាច្រើនទៀត ដែលគេមិនទាន់បានទាញយកអស់ឱ្យអស់ពីលទ្ធភាព។
លោកស្រី Tạ Thu Trang បានថ្លែងថា អំឡុងឆ្នាំ២០០៩-២០២១ វិនិយោគិនបរទេស បានចុះបញ្ជីគម្រោងតិចជាង២.០០០គម្រោងប៉ុណ្ណោះ ដែលស្មើត្រឹមតែ៥,៧% នៃគម្រោងទាំងអស់នៅវៀតណាម ជាមួយនឹងទុនវិនិយោគ១៧,៦៤ ពាន់លានដុល្លារអាមេរិក ឬស្មើនឹង៤,៣%នៃការវិនិយោគសរុប៕ Vietnam News៕