ដោយ: លាងហួរ
វ៉ាស៊ីនតោន: លោក Elon Musk បានគ្រប់គ្រងបណ្តាញសង្គមយក្សTwitter ជាផ្លូវការបន្ទាប់ពីលោកបានបញ្ចប់ កិច្ចព្រមព្រៀងចំនួន៤៤ពាន់លានដុល្លារ ដើម្បីទិញបណ្តាញទំនាក់ទំនងសង្គមដ៏ធំមួយនេះ។
លោក Elon Musk បានបណ្តេញនាយកប្រតិបត្តិកំពូលចំនួន៣រូប ក្នុងនោះ រួមមាន នាយកប្រតិបត្តិលោក Parag Agrawal ផងដែរ។ នេះបើយោងតាមការចុះផ្សាយដោយកាសែត Washington Post។
កាសែតWashington Post បានរាយការណ៍ថា ប្រធានផ្នែកហិរញ្ញវត្ថុ លោក Ned Segal និងលោកស្រី Vijaya Gadde ដែលជានាយកប្រតិបត្តិកំពូលផ្នែកគោលនយោបាយច្បាប់ ទំនុកចិត្ត និងសុវត្ថិភាព ក៏ត្រូវបានបណ្តេញចេញផងដែរ។
ចំណែកផ្សារហ៊ុន Twitter នឹងត្រូវបានផ្អាកពីការជួញដូរ នៅល់ផ្សារហ៊ុនញូវយ៉កនៅថ្ងៃសុក្រ នេះបើយោងតាមគេហទំព័ររបស់ផ្សារហ៊ុន។
លោកElon Musk បានសន្យាថា នឹងកាត់បន្ថយការងារ និងការចំណាយរបស់Twitter ដើម្បីជំរុញការច្នៃប្រឌិតផលិតផល ក្នុងគោលបំណងបង្កើតកម្មវិធីទំនើប ដែលរួមបញ្ចូលការទូទាត់ ពាណិជ្ជកម្ម និងការផ្ញើសារ។
លោក Elon Musk ត្រូវបានគេរំពឹងថា នឹងដើរតួជានាយកប្រតិបត្តិរហូតដល់លោកជ្រើសរើសអ្នកដឹកនាំថ្មីបាន។
លោក Musk ដែលពណ៌នាខ្លួនលោកថា ជាអ្នកនិយាយដោយសេរីបានរិះគន់គោលនយោបាយរបស់Twitter ដោយលោកបានជំទាស់នឹងការចាប់ពិរុទ្ធដែលហួសពីតម្រូវការនៃច្បាប់។
កាលពីខែឧសភា លោក Musk បាននិយាយថា លោកនឹងបញ្ចូលគណនី Twitter របស់អតីតប្រធានាធិបតីសហរដ្ឋអាមេរិក លោក Donald Trump ឡើងវិញ ដែលត្រូវបានដកចេញពីបទចោទប្រកាន់ថា បានញុះ ញង់ឲ្យមានអំពើហិង្សា បន្ទាប់ពីមានកុបកម្មកាលពីថ្ងៃទី៦ ខែមករា នៅវិមាន Capitol របស់សហរដ្ឋអាមេរិក៕