ដោយ៖ ម៉ាណេត
ភ្នំពេញ៖ កិច្ចព្រមព្រៀងពាណិជ្ជកម្មសេរី (FTA) នឹងបង្កើនពាណិជ្ជកម្មទ្វេភាគីរវាងកម្ពុជានិងកូរ៉េខាងត្បូង និងជំរុញការវិនិយោគបន្ថែមទៀត ពីកូរ៉េខាងត្បូងមកកម្ពុជា។ នេះបើយោងតាមកាលើកឡើង របស់ឯកអគ្គរដ្ឋទូតកូរ៉េខាងត្បូងប្រចាំកម្ពុជា លោក Park Heung-kyeong ។
លោក Heung-kyeong មានប្រសាសន៍ ក្នុងទិវាបង្កើតជាតិរបស់កូរ៉េកាលពីចុងសប្តាហ៍នេះថា “នៅពេលកិច្ចចរចា FTA រវាងកម្ពុជា និងកូរ៉េខាងត្បូង ត្រូវបានបញ្ចប់ដោយជោគជ័យ យើងអាចរំពឹងថានឹងមានការកើនឡើងនូវពាណិជ្ជកម្ម និងវិនិយោគទ្វេភាគី។
ការលើកឡើងរបស់លោក ត្រូវបានធ្វើឡើង ខណៈប្រទេសទាំងពីរចាប់ផ្តើមកិច្ចចរចាជុំទី៣ស្តីពី កិច្ចព្រមព្រៀងពាណិជ្ជកម្មសេរីទ្វេភាគី ដោយមានការប្តេជ្ញារួមគ្នា ដើម្បីបញ្ចប់កិច្ចព្រមព្រៀងនៅមុនដំណាច់ឆ្នាំនេះ។
លោកឯកអគ្គរដ្ឋទូត បានមានប្រសាសន៍ថា ចាប់តាំងពីការបង្កើតទំនាក់ទំនងការទូតរបស់ប្រទេសទាំងពីរនៅក្នុងឆ្នាំ ១៩៩៧ ទំហំពាណិជ្ជកម្មទ្វេភាគីបានកើនឡើង ១៩ ដងពី៥៤លានដុល្លារ ដល់១ពាន់លានដុល្លារ ហើយការផ្លាស់ប្តូរប្រជាជននិងប្រជាជនបានកើនឡើង២៨០ដង។
លោកបានបន្ថែមថា ប្រទេសកូរ៉េ ក្នុងនាមជាដៃគូដែលផ្តល់ផលប្រយោជន៍ ដល់គ្នាទៅវិញទៅមករបស់ប្រទេសកម្ពុជា បានសកម្មក្នុងការជំរុញពាណិជ្ជកម្ម និងវិនិយោគ ក៏ដូចជាការផ្លាស់ប្តូរប្រជាជននិងប្រជាជន និងវប្បធម៌។
លោកបានសង្កត់ធ្ងន់ថា បើនិយាយពីការវិនិយោគទុននៅកម្ពុជា ប្រទេសកូរ៉េឈរលំដាប់ទី២ ជារួមក្រុមហ៊ុនកូរ៉េជាង២០០ កំពុងធ្វើអាជីវកម្មយ៉ាងសកម្ម នៅក្នុងឧស្សាហកម្មឈានមុខគេរបស់កម្ពុជា ដូចជាកាត់ដេរ កសិកម្ម និងហិរញ្ញវត្ថុ។
នៅខែកុម្ភៈឆ្នាំនេះ សម្តេចតេជោហ៊ុន សែន នាយករដ្ឋមន្ត្រីនៃកម្ពុជា បានធ្វើទស្សនកិច្ចនៅទីក្រុងសេអ៊ូល និងបានជួបពិភាក្សាប្រកបដោយផ្លែផ្កា ជាមួយលោកមូន ជេអ៊ីន ប្រធានាធិបតីនៃសាធារណរដ្ឋកូរ៉េ។
មេដឹកនាំទាំងពីរ បានកោតសរសើរ ចំពោះការពង្រឹងទំនាក់ទំនងទ្វេភាគីរឹងមាំ និងសមិទ្ធិផលគួរឱ្យកត់សម្គាល់ ដែលបានធ្វើតាមរយៈវិស័យកិច្ច សហប្រតិបត្តិការផ្សេងៗគ្នា៕
