ដោយៈ គង់ ម៉ាលីនណា
ភ្នំពេញៈ ទំនុកចិត្តបានបន្តកើនឡើង នៅតាមគ្រឹះស្ថានមីក្រូហិរញ្ញវត្ថុពីសាធារណៈជននានា ដោយរយៈពេលត្រឹម៦ខែទំហំសាច់ប្រាក់ ផ្ញើរនៅតាមគ្រឹះស្ថានមីក្រូហិរញ្ញវត្ថុនានាបានកើនឡើងខ្ពស់។
អ្នកនាំពាក្យសមាគមមីក្រូហិរញ្ញវត្ថុកម្ពុជា លោក កាំង តុងងីបានមានប្រសាសន៍ឲ្យដឹងកាលពីដើមសប្តាហ៍នេះថា គិតត្រឹមត្រីមាសទី២ឆ្នាំ ២០២២ ប្រាក់បញ្ញើនៅតាមគ្រឹះស្ថានមីក្រូហិរញ្ញវត្ថុដែលជាសមាជិករបស់សមាគមមីក្រូហិរញ្ញវត្ថុកម្ពុជា បានកើនឡើងដល់៤៦៥០លានដុល្លារអាមេរិក គឺបានកើនឡើង២៤៧ លានដុល្លារបើធៀបនឹងត្រីមាសទី១ ឆ្នាំ ២០២២ ក្នុងចំណោមអតិថិជន២,៦២៣,៩១០គណនី។
លោកបន្តថា សម្រាប់វិស័យធនាគារ និងហិរញ្ញវត្ថុទាំងមូល ប្រាក់បញ្ញើសរុបមានចំនួនជិត៥០ពាន់លានដុល្លារអាមេរិក។
ជាមួយគ្នានេះ លោក សុខ វឿន នាយកប្រតិបត្តិគ្រឹះស្ថានមីក្រូហិរញ្ញវត្ថុអិលអូអិលស៊ី បានគូសបញ្ជាក់ដែរថា នៅពេលដែលពលរដ្ឋយកប្រាក់សន្សំ ទៅទុកនៅធនាគារ ឬមីក្រូហិរញ្ញវត្ថុ វាធានាសុវត្ថិភាពប្រាក់សន្សំ និងជំរុញកំណើនសេដ្ឋកិច្ចជាតិ។
លោកបានបន្តថា “ការអំពាវនាវរបស់យើង ជាយុទ្ធសាស្ត្រមួយរបស់ស្ថាប័នធនាគារ និងមីក្រូហិរញ្ញវត្ថុដើម្បីផ្សព្វផ្សាយ អំពីចំណេះដឹងហិរញ្ញវត្ថុដល់ប្រជាជនគ្រប់ស្រទាប់វណ្ណៈ អំពីអត្ថប្រយោជន៍ដែលដាក់ប្រាក់នៅមីក្រូហិរញ្ញវត្ថុ ឬធនាគារដើម្បីបានការប្រាក់”៕