ដោយ: លាងហួរ
សេអ៊ូល: យោងតាមប្រភពហិរញ្ញវត្ថុ កាលពីថ្ងៃច័ន្ទម្សិលមិញ បានឱ្យដឹងថា ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក Choo Kyung-ho នឹងលើកកម្ពស់សក្តានុពលរបស់កូរ៉េ ដែលជាទិសដៅរកប្រាក់ចំណេញ សម្រាប់អ្នកវិនិយោគក្រៅប្រទេស នៅក្នុងដំណើរទស្សនកិច្ចរបស់លោកទៅកាន់សហរដ្ឋអាមេរិកក្នុងសប្តាហ៍នេះ។
លោក Choo បានចាកចេញទៅកាន់សហរដ្ឋអាមេរិក កាលពីថ្ងៃចន្ទ ដើម្បីចូលរួមការជួបជុំដែលពាក់ព័ន្ធនឹងរដ្ឋមន្ត្រីហិរញ្ញវត្ថុ មកពីប្រទេស G20 ក៏ដូចជា ប្រធានធនាគារពិភពលោក មូលនិធិរូបិយវត្ថុអន្តរជាតិ (IMF) និងទីភ្នាក់ងារវាយតម្លៃសំខាន់ៗចំនួនបីរបស់ពិភពលោក គឺ S&P Moody’s និង Fitch។
កិច្ចប្រជុំទាំងទ្វេភាគី ឬពហុភាគី នឹងត្រូវធ្វើឡើងនៅចន្លោះថ្ងៃពុធ និងថ្ងៃសុក្រ នៅទីក្រុងវ៉ាស៊ីនតោន ឌីស៊ី ដោយសារការកើនឡើងនៃការប្រែប្រួលនៅក្នុងទីផ្សារហិរញ្ញវត្ថុរបស់ប្រទេសកូរ៉េ និងការហូរចេញនៃមូលធនបរទេសកំពុងបន្ថែមការព្រួយបារម្ភអំពីវិបត្តិសេដ្ឋកិច្ចដែលអាចកើតមាន។
ប្រភពមួយបានរាយការណ៍ថា រដ្ឋមន្ត្រីហិរញ្ញវត្ថុគ្រោងនឹងពន្យល់ថា សុខភាពសារពើពន្ធរបស់ប្រទេសកូរ៉េខាងត្បូងនៅតែមានស្ថិរភាព បើទោះបីជាមានការកើនឡើងហានិភ័យសេដ្ឋកិច្ចក្នុងនិងក្រៅប្រទេសក៏ដោយ។
មុនពេលធ្វើដំណើរទៅកាន់ទីក្រុងវ៉ាស៊ីនតោន លោក Choo នឹងឈប់នៅក្រុងញូវយ៉កនៅថ្ងៃអង្គារ ដើម្បីផ្តល់ពត៌មានសង្ខេបដ៏កម្រមួយ អំពីសេដ្ឋកិច្ចកូរ៉េសម្រាប់អ្នក ដែលចាប់អារម្មណ៍ក្នុងការវិនិយោគនៅក្នុងទីផ្សារកូរ៉េ៕
