ដោយៈ
អង្គការបណ្តុះបណ្តាលថ្នាក់មូលដ្ឋាន (OBT)ដែលបានបង្កើតឡើងដោយស្ថាបនិកក្នុងស្រុក បាននិងកំពុងផលិតប្រេងឆាពីផ្កាឈូករ័ត្ន ដើម្បីបំពេញតម្រូវការក្នុងស្រុក និងអាចផ្គត់ផ្គង់ខ្លួនឯងបាន។
ស្ថាបនិកអង្គការបណ្តុះបណ្តាលថ្នាក់មូលដ្ឋាន (OBT) លោក ប៉ត សុផល ជាដែលបានបង្កើតតាំងពីឆ្នាំ ២០០៩ នៅភូមិជីរោទ៍ក្រោម ២ ឃុំជីរោទ៍ទី១ ស្រុក និងខេត្តត្បូងឃ្មុំ នៅលើផ្ទៃដីជាង១ហិកតា។
លោកបង្ហើបឱ្យដឹងពីគម្រោងនានា ដែលមាននៅអង្គការរបស់លោក រួមមាន ដូចជា គម្រោងទឹកស្អាត គម្រោងដំណាំសុវត្ថិភាព ឬសិប្បកម្មជាដើមក្នុងនោះ ក៏មានការកែច្នៃប្រេងឆាពីគ្រាប់ឈូករ័ត្នផងដែរ ដែលជាប្រភពរកប្រាក់ចំណូល សម្រាប់ការផ្គត់ផ្គង់ឱ្យមាននិរន្តរភាពនៅក្នុងអង្គការ។
លោកបានឲ្យដឹងថា ដើមឆ្នាំ២០២២នេះ អង្គការបានទិញម៉ាស៊ីនថ្មី សម្រាប់គាបយកប្រេងឆាពីគ្រាប់ឈូករ័ត្ន និងចាប់ផ្តើមធ្វើគម្រោងផលិតប្រេងឆានេះឡើងវិញ។ តាមពិតទៅគម្រោងនេះ យើងធ្លាប់បានធ្វើដំបូងកាលពីឆ្នាំ២០១៨ តែបានផ្អាកវិញនៅឆ្នាំ ២០១៩ ដោយសារតែម៉ាស៊ីនគាបយកប្រេងឆានោះវាខូច។
ស្ថាបនិកអង្គការ OBT រូបនេះបានឱ្យដឹងទៀតថា កាលពីខែកក្កដា ឆ្នាំ ២០២២ កន្លងមកនេះ យើងផលិតប្រេងឆាពីគ្រាប់ឈូករ័ត្ន បានចំនួនជាង ២០០ដប ហើយ១ដបមានចំណុះ២៥០មីល្លិលីត្រ។ ប្រេងឆាទាំងអស់នោះយើងបានលក់អស់ហើយដែរ ដោយសារមានម៉ូយដែលរស់នៅរាជធានីភ្នំពេញ និងខេត្តកំពង់ចាមបានជាវអស់។ ប្រេងឆាផលិតពីគ្រាប់ឈូករ័ត្នរបស់យើងលក់១ដប ក្នុងតម្លៃ១៤,០០០រៀល។
មន្ទីរពាណិជ្ជកម្មខេត្តត្បូងឃ្មុំ ក៏ធ្លាប់បានសិក្សាលើគម្រោងធ្វើប្រេងឆាពីគ្រាប់ឈូករ័ត្នរបស់អង្គការ OBT ចំនួន២លើកមកហើយដែរ ខណៈមន្ទីរពាណិជ្ជកម្មខេត្តកំពង់ចាមវិញ ក៏តែងបានលើកទឹកចិត្តឱ្យអង្គការលោក នាំយកផលិតផលទៅដាក់បង្ហាញក្នុង កម្មវិធីពិព័រណ៍ភូមិ១ ផលិតផល១ ដូចគ្នា។
លោកប៉ត សុផល បានបញ្ជាក់ថា ខាងមន្ទីរពាណិជ្ជកម្មខេត្តត្បូងឃ្មុំ និងកំពង់ចាម បានជំរុញឱ្យបន្តការសិក្សា ពីបច្ចេកទេសបន្ថែមទៀត ដើម្បីអភិវឌ្ឍការផលិតប្រេងឆា ដែលមានក្នុងស្រុកមួយនេះ ឱ្យបានចំនួនកាន់តែច្រើនតាមតម្រូវការ និងឱ្យនាំយកទៅដាក់តាំងបង្ហាញ ក្នុងកម្មវិធីពិព័រណ៍ភូមិ១ ផលិតផល១។
លោកបានបន្តថា “សព្វថ្ងៃនេះ ខ្ញុំក៏បានឆ្លៀតទៅសិក្សាស្វែងយល់បន្ថែមពីបច្ចេកទេស នៃការផលិតជាមួយនឹងសាលាមួយរបស់កូរ៉េ នៅក្នុងរាជធានីភ្នំពេញរៀងរាល់ពេលចុងសប្តាហ៍”។ លោកបន្តថា “ក្រោយពីរៀនចប់វគ្គនេះទៅ ខ្ញុំក៏មានគម្រោងបង្កើនការផលិតប្រេងឆា ពីគ្រាប់ឈូករ័ត្ន ឱ្យមានចំនួនច្រើនផងដែរ”៕
