ដោយៈ គង់ សូរិយា
ភ្នំពេញៈ សហប្រធានក្រុមការងារវេទិការរដ្ឋាភិបាល និងវិស័យឯកជននិងពន្ឋដារ បានរៀបចំសំណើសុំរដ្ឋាភិបាល លើកលែងការកាត់ទុកពន្ឋលើប្រាក់ចំណេញ១ភាគរយពីវិស័យកសិកម្ម ដើម្បីជម្រុញវិស័យនេះឲ្យមានភាពរីកចម្រើន។
អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេងបានមានប្រសាសន៍ឲ្យដឹងតាមបណ្តាញតេឡេក្រាម កាលពីល្ងាចថ្ងៃទី៦ តុលាថា សំណើរនេះ នឹងត្រូវដាក់ជូនរដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងលោកឧបនាយករដ្ឋមន្រ្តីអូន ព័ន្ឋមុនីរ័ត្នរដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុនាពេលខាងមុខនេះ។
លោកឧកញ៉ាបានពន្យល់ថា កន្លងមកក្រសួងសេដ្ឋកិច្ច បានព្យូរលើផលិតផលកសិកម្ម៦ ទៅ៧មុខក្នុងរយៈពេល៥ឆ្នាំ។ ដូច្នេះដើម្បីស្តារនិងលើកស្ទួយវិស័យកសិកម្ម ក្នុងពេលរដ្ឋាភិបាលដាក់ចេញគោលនយោបាយក្រោយវិបត្តិកូវីដ១៩ ដើម្បីយកវិស័យកសិកម្មជាស្នូល ដើម្បីស្តារសេដ្ឋកិច្ចឡើងវិញនេះ ដូច្នេះដើម្បីទាក់ទាញការវិនិយោគ ពីអ្នកវិនិយោគក្នុងស្រុក និងបរទេស មកវិនិយោគកាន់តែច្រើន ដើម្បីកែច្នៃផលិតផលកសិកម្ម កសិឧស្សាហកម្ម ដើម្បីនាំចេញបានកាន់តែច្រើននេះ យើងនឹងដាក់សំណើរស្នើសុំរដ្ឋាភិបាល ដើម្បីលើកលែងពន្ឋកាត់ទុកពន្ឋ១ភាគរយ ដើម្បីរំលស់លើប្រាក់ចំណេញ។
លោកឧកញ៉ាលឹម ហេងបានបន្តថា ហេតុនេះខាងវិស័យឯកជនបានស្នើឲ្យរដ្ឋាភិបាល មិនបាច់មានការកាត់ទុក១ភាគរយនោះទេ ព្រោះបើអ្នកនាំចេញផលិតផលកសិកម្មចំណេញ នឹងបង់ពន្ឋលើប្រាក់ចំណេញប្រចាំឆ្នាំ២០ភាគរយហើយ។ លោកបន្តថា ដើម្បីទាក់ទាញអ្នកវិនិយោគកាន់តែច្រើនយើងលើកទឹកចិត្ត បើមិនយកពន្ឋ១ភាគរយលើការនាំចេញ ដោយសារកន្លងមកការនាំចេញ ផលិតផលកសិកម្មភាពច្រើន យើងមិនទាន់រកបានផលចំណេញនៅឡើយ ប៉ុន្តែរដ្ឋាភិបាលបានកាត់ពន្ឋមួយភាគរយ លើប្រាក់ចំណេញ១ភាគរយរួចទៅហើយ។
លោកឧកញ៉ាលឹម ហេងបានបន្តទៀតថា ប៉ុន្តែយ៉ាងណាវិញ វិស័យស្រូវ អង្ករ រដ្ឋាភិបាលបានលើកលែងពន្ឋពន្ឋកាត់ទុកនាំចេញនាំចេញផង ហើយរដ្ឋាភិបាល មិនយកពន្ឋលើប្រាក់ចំណេញទៀតផង។ ហេតុនេះខាងវិស័យកសិកម្មទាំងអស់ យើងនឹងស្នើរដ្ឋាភិបាលលើកទឹកចិត្ត លើការមិនយកពន្ឋ១ភាគរ យរំលស់ប្រាក់ចំណេញ ក្នុងគ្រប់ផលិតផលកសិកម្មទាំងអស់៕
