ដោយៈគង់ ម៉ាលីនណា
ភ្នំពេញៈ អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេងបានមានប្រសាសន៍ថា ការចូលជាធរមាននៃកិច្ចព្រមព្រៀងពាណិជ្ជកម្មសេរី(FTA)រវាងកម្ពុជា និងកូរ៉េ នឹងជួយជម្រុញការនាំចេញពីកម្ពុជា បន្ថែមទៀត ពិសេសផលិតផលកសិកម្ម។
លោកឧកញ៉ាបានមានប្រសាសន៍ឲ្យដឹងតាមទូរស័ព្ទ នារសៀលថ្ងៃទី៤ តុលានេះថា សកម្មភាពសេដ្ឋកិច្ច ពាណិជ្ជកម្មកម្ពុជា កំពុងមានភាពល្អប្រសើរ ដោយការនាំចេញ និងនាំចូលរបស់យើងមានកំណើនល្អប្រសើរ ជាក់ស្តែងការប្រមូលពន្ឋគយ និងពន្ឋដារបស់យើងបានកើនឡើង។ លោកឧកញ៉ាបានបន្តថា ទន្ទឹមគ្នានេះ នៅពេលកិច្ចព្រមព្រៀងFTAរវាងកម្ពុជា កូរ៉េចូលជាធរមានទំហំ នៃការនាំចេញរបស់យើងនឹងកើនបន្តទៀត។
លោកឧកញ៉ាលឹម ហេងបានបន្តថា “កិច្ចព្រមព្រៀងនេះ នឹងមានសក្តានុពលជាងកិច្ចព្រមព្រៀងFTAជាមួយចិន ដោយសារកិច្ចព្រមព្រៀងជាមួយកូរ៉េ នឹងមានការលើកលែងពន្ឋ១០០ភាគរយ លើការនាំចេញផលិតផលកសិកម្មពីកម្ពុជា”។
ទាក់ទងនឹងទីផ្សារជាមួយប្រទេសចិន លោកឧកញ៉ាលឹម ហេងបានមានប្រសាសន៍ឲ្យដឹងថា ក្រសួងកសិកម្មបានជូនដំណឹងដល់ម្ចាស់សត្វចិញ្ចឹមនានា ដើម្បីបំពេញបែបបទតាមនិតិវិធី ដើម្បីសម្រួលដល់ការនាំចេញសត្វពីកម្ពុជា ស្របពេលបច្ចុប្បន្ននេះប្រទេសចិន បាននាំចេញផលិតផលកសិកម្មពីកម្ពុជាជាច្រើនផងដែរ ដូចជាស្វាយ ចេកអំបូងលឿន មៀនប៉ៃលិនជាដើម៕