ដោយៈ ម៉ាលីនណា
ភ្នំពេញៈ ប្រធានក្រុមប្រឹក្សាភិបាលក្រុមហ៊ុនក្រេឌីតប្យួរ៉ូ ខេមបូឌា (CBC) លោកស្រី ជា សេរីបានមានប្រសាសន៍ថា បច្ចុប្បន្ន CBC បានដើរតួនាទីយ៉ាងសំខាន់ ក្នុងការរៀបចំហេដ្ឋារចនាសម្ព័ន្ធ ទិន្នន័យហិរញ្ញវត្ថុនៅកម្ពុជា។
ស្ថាប័ននេះ បានរក្សាទុកទិន្នន័យឥណទាន របស់អតិថិជនប្រមាណ ៧លាននាក់ ក្នុងប្រព័ន្ធស្នូលរបស់ខ្លួន ដើម្បីបម្រើជូនគ្រឹះស្ថានធនាគារ និងហិរញ្ញវត្ថុដែលជាសមាជិក នៅក្នុងការលើកកម្ពស់តម្លាភាព និងប្រសិទ្ធភាពទីផ្សារឥណទាន។
លោកស្រី ជា សិរីបានមានប្រសាសន៍បែបនេះ ក្នុងខួប១០ឆ្នាំ នៃការបង្កើត CBC កាលពីថ្ងៃទី ៣០ ខែកញ្ញា ឆ្នាំ ២០២២កន្លងមកនេះ។
លោកស្រីបានបន្តទៀតថា បើគ្មានវត្តមានរបស់CBC គ្រឹះស្ថានធនាគារ និងហិរញ្ញវត្ថុ ទាំងអស់អាចនឹងប្រឈម នូវការចំណាយប្រតិបត្តិការខ្ពស់ និងកង្វះនូវព័ត៌មាន ដ៏មានសារៈសំខាន់របស់អ្នកខ្ចីប្រាក់ ហើយក៏អាចបង្កជាហានិភ័យ នៅពេលការសម្រេចចិត្តផ្តល់ឥណទាន។ ជាការពិតព័ត៌មានឥណទាន ដែលមានលក្ខណៈគ្រប់ជ្រុងជ្រោយ និងមានតម្លាភាព គឺជាតម្រូវការចាំបាច់បំផុត និងដំបូងគេបង្អស់សម្រាប់គ្រប់គ្រងហានិភ័យ និងស្ថិរភាពហិរញ្ញវត្ថុ។
លោកស្រីបញ្ជាក់ថា CBC កំពុងរួមចំណែកយ៉ាងសកម្ម ក្នុងការជួយគាំទ្រស្ថិរភាពហិរញ្ញវត្ថុ រួមមាន គ្រឹះស្ថានធនាគារ និងហិរញ្ញវត្ថុ អាចប្រើប្រាស់ប្រព័ន្ធចែករំលែកឥណទានរបស់ CBC ដើម្បីពិនិត្យមើលហានិភ័យប្រាក់កម្ចី និងសម្ពាធឥណទានទាំងមូល និងអាចជួយដល់ធនាគារជាតិនៃកម្ពុជា ក្នុងការស្វែងយល់ពីហានិភ័យឥណទាន នៅពេលដែលគ្រឹះស្ថានហិរញ្ញវត្ថុបានផ្តល់កម្ចីជូនអតិថិជនខ្លួន និងអាចចាត់វិធានការឆ្លើយតបបានរហ័ស និងមានប្រសិទ្ធភាព និងទាន់ពេលវេលាក្នុងការបញ្ចៀសហានិភ័យផ្សេងៗ។
លោកស្រីថ្លែងថា “វត្តមានប្រព័ន្ធចែករំលែកព័ត៌មានឥណទាន ប្រកបដោយសុវត្ថិភាព តម្លាភាព និងគណនេយ្យភាពពិត ជាជួយទីផ្សារហិរញ្ញវត្ថុឥណទានកាន់តែមានអំណោយផល តាមរយៈការកាត់បន្ថយការផ្តល់ឥណទានខ្វះខាតព័ត៌មានរបស់អ្នកខ្ចី”។
CBC បានរួមចំណែកជួយជំរុញឱ្យវិស័យហិរញ្ញវត្ថុ និងទីផ្សារឥណទានរីកចម្រើនខ្លាំងគួរឱ្យកត់សម្គាល់ មិនតែប៉ុណ្ណោះបានជួយប្រជាជនកម្ពុជាឱ្យមានលទ្ធភាព ទទួលបានឥណទានកាន់តែធំទូលាយ និងមានកំណើនរៀងរាល់ឆ្នាំ។ CBC មិនត្រឹមតែរក្សាទុកនូវព័ត៌មានប្រវត្តិឥណទាន អវិជ្ជមានប៉ុណ្ណោះទេ ក៏ប៉ុន្តែព័ត៌មានប្រវត្តិវិជ្ជមានផងដែរ ក្នុងគោលបំណងលើកទឹកចិត្តក្នុងការប្រើប្រាស់ឥណទាន ប្រកបដោយទំនួលខុសត្រូវរបស់អ្នកខ្ចី៕