ដោយ៖ សហការី
ភ្នំពេញ៖ កម្ពុជារំពឹងនឹងទទួលបានផលប្រយោជន៍ជាច្រើន ពីសន្និសីទគោលនយោបាយអន្តរជាតិឆ្នាំ២០២២ ស្តីពី ការពង្រឹងភាពជាដៃគូរវាងអាស៊ាន-កូរ៉េ ក្នុងដំណាក់កាលក្រោយវិបត្តិកូវីដ-១៩ ដើម្បីកសាងអនាគតរួមគ្នា ដែលចាប់ផ្តើមពីថ្ងៃនេះ ដល់ថ្ងៃទី៣០ ខែកញ្ញា ឆ្នាំ២០២២។
លោក យក់ ប៊ុនណារដ្ឋលេខាធិការប្រចាំការ និងជានាយកសាលាភូមិន្ទរដ្ឋបាល នៃក្រសួងមុខងារសាធារណៈ នៅថ្ងៃទី២៩ ខែកញ្ញា នេះ ខណៈអញ្ជើញជាអធិបតីភាពបើកសន្និសីទគោលនយោបាយសាធារណៈអន្តរជាតិ សម្រាប់ឆ្នាំ២០២២ ស្តីពី “ការពង្រឹងភាពជាដៃគូ រវាងអាស៊ាន-កូរ៉េ ក្នុងដំណាក់កាលក្រោយវិបត្តិកូវីដ-១៩ ដើម្បីកសាងអនាគតរួមគ្នា”។
លោកបានមានប្រសាសន៍ថា គោលបំណងសំខាន់ ក្នុងការរៀបចំសន្និសីទអន្តរជាតិនេះ គឺដើម្បីផ្តល់ឱកាសក្នុងការវិភាគទៅលើកិច្ចខិតខំប្រឹងប្រែង រវាងបណ្តាប្រទេសអាស៊ាន និងកូរ៉េ ក្នុងការពង្រឹងភាពជាដៃគូក្នុងទំនាក់ទំនងកាទូត ការផ្លាស់ប្តូរសង្គម-វប្បធម៌ និងកំណើនសេដ្ឋកិច្ចរួមគ្នា ព្រមទាំងស្វែងរកយុទ្ធសាស្ត្រក្នុងការបន្តកិច្ចសហប្រតិបត្តិការ ដើម្បីកសាងសហគមន៍តំបន់ ដែលអាចគាំទ្រគ្នាទៅវិញមក ជាពិសេស ក្នុងដំណាក់កាលក្រោយវិបត្តិកូវីដ-១៩។
លោក ជុង គុក រ៉ី (Jong Kook Rhee) អនុប្រធានប្រតិបត្តិ នៃមូលនិធិកូរ៉េ បានឱ្យដឹងថា បេសកកម្មចម្បងរបស់មូលនិធិកូរ៉េ គឺកសាងមិត្តភាពប្រជាពលរដ្ឋគ្រប់ទិសទីនៅលើពិភពលោក រាប់បញ្ចូលទាំងតំបន់អាស៊ាន ហើយកូរ៉េចាត់ទុកកម្ពុជាជាដៃគូយ៉ាងសំខាន់។
លោករំពឹងថា សន្និសីទអន្តរជាតិនេះ នឹងជួយពង្រឹងកិច្ចសហប្រតិបត្តិការអាស៊ាន និងកូរ៉េបន្ថែមទៀត។ សន្និសីទស្តីពី “ការពង្រឹងភាពជាដៃគូ រវាងអាស៊ាន-កូរ៉េ បានធ្វើឡើងនៅរាជធានីភ្នំពេញ ចាប់ផ្តើមពីថ្ងៃទី២៩ ដល់៣០ ខែកញ្ញានេះ ដែលមានការចូលរួមពីវាគ្មិនធ្វើបទបង្ហាញ និងពិភាក្សា ប្រមាណ៦០នាក់ ព្រមទាំងសិក្ខាកាម ប្រមាណ២០០នាក់ ដែលជាមន្ត្រីជាន់ខ្ពស់រដ្ឋាភិបាល អ្នកវិភាគគោលនយោបាយ និងអ្នកស្រាវជ្រាវ ដែលអញ្ជើញមកពីប្រទេស ចំនួន១០ ដោយក្នុងនោះ មានប្រទេសអាស៊ាន ចំនួន៨ កូរ៉េខាងត្បូង និងប្រទេសអូស្ត្រាលី។ ភាពជាដៃគូកូរ៉េ-អាស៊ាន បានរីកចម្រើនគួរឲ្យកត់សំគាល់ក្នុងរយៈពេលបីទសវត្សរ៍ចុងក្រោយនេះ ដោយបានផ្តោតលើការពង្រីកយ៉ាងឆាប់រហ័សនូវទំនាក់ទំនងនយោបាយ សេដ្ឋកិច្ច និងសង្គម-វប្បធម៌៕