ដោយ៖ សុផារី
ភ្នំពេញ៖ វិនិយោគិនកូរ៉េ ចាប់អារម្មណ៍កាន់តែច្រើន ចំពោះកាលានុវត្តភាពនៃការវិនិយោគ និងនាំចេញទំនិញពីកម្ពុជាទៅទីផ្សារប្រទេសកូរ៉េ បានកាន់តែច្រើន។
គណៈប្រតិភូសមាគមន៍អ្នកនាំចូលកូរ៉េ (Korea Importers Association – KOIMA) ដឹកនាំដោយ លោក KIM Byung Kwan ប្រធានសមាគមន៍អ្នកនាំចូលកូរ៉េ និងជាប្រធានអគ្គនាយកក្រុមហ៊ុន Bronte Family Ltd បានស្វែងយល់ពីឱកាសពាណិជ្ជកម្ម និងធុរកិច្ចនៅកម្ពុជា។
លោក កឹម ស៊ីថន រដ្ឋលេខាធិការប្រចាំការ ក្រសួងពាណិជ្ជកម្ម បានអញ្ជើញទទួលជួបគណៈប្រតិភូសមាគមន៍អ្នកនាំចូលកូរ៉េ (Korea Importers Association – KOIMA) ដឹកនាំដោយ លោក KIM Byung Kwan ប្រធានសមាគមន៍អ្នកនាំចូលកូរ៉េ និងជាប្រធានអគ្គនាយកក្រុមហ៊ុន Bronte Family Ltd. នៅព្រឹកថ្ងៃទី១៩ ខែកញ្ញា ឆ្នាំ២០២២។
លោក កឹម ស៊ីថន រដ្ឋលេខាធិការប្រចាំការ បានគូសបញ្ជាក់ថា ចំពោះការអញ្ជើញមកទស្សនកិច្ចស្វែងយល់ និងចាប់យកនូវកាលានុវត្តភាពសេដ្ឋកិច្ច និងពាណិជ្ជកម្ម របស់ លោក Kim Byung Kwan ប្រធានសមាគមអ្នកនាំចូលកូរ៉េ និងគណៈប្រតិភូ នៅព្រះរាជាណាចក្រកម្ពុជា និយាយជារួម នឹងជួយឱ្យគណៈប្រតិភូ ជ្រាបច្បាស់ថែមទៀតពីសក្តានុពលរបស់កម្ពុជា នាពេលបច្ចុប្បន្ន។
លោកលើកទឹកចិត្តដល់គណៈប្រតិភូសមាគមន៍អ្នកនាំចូលកូរ៉េ ប្រើប្រាស់នូវកិច្ចព្រមព្រៀងពាណិជ្ជកម្មសេរីតំបន់ និងដៃគូសេដ្ឋកិច្ច ដែលកម្ពុជាជាសមាជិក ជាពិសេស កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ RCEP កិច្ចព្រមព្រៀងពាណិជ្ជកម្មសេរីអាស៊ាន-កូរ៉េ និងកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ (CKFTA) ជាដើម។
លោក KIM Byung Kwan បានជម្រាបជូនថា សហគមន៍អ្នកនាំចូលកូរ៉េ បង្កើតឡើងនៅឆ្នាំ១៩៧២ គិតមកទល់ពេលនេះមានអាយុកាល៥២ឆ្នាំ ហើយមានក្រុមហ៊ុនជាសមាជិកចំនួន៨៣០០ក្រុមហ៊ុន ដែលកំពុងធ្វើប្រតិបត្តិការអាជីវកម្មលើវិស័យចំណីអាហារ គ្រឿងបន្លាស់ Software គ្រឿងសម្អាង វត្ថុធាតុដើម វាយនភណ្ឌ កសិកម្ម និងសេវាកម្មជាដើម។ សហគមន៍អ្នកនាំចូលកូរ៉េ ក៏បានប្រទេសជាដៃគូចំនួន៦៩ និងមានទំនាក់ទំនងជិតស្និទជាមួយស្ថាទូតនៃប្រទេសនានាប្រចាំសាធារណរដ្ឋកូរ៉េចំនួន១០៤ផងដែរ៕