ដោយៈ សុខុម
សិង្ហបុរី: ការលក់ផ្ទះឯកជនថ្មីៗនៅក្នុងប្រទេសសិង្ហបុរី បានធ្លាក់ចុះខ្លាំងរហូតដល់ទៅ៤៧,៦%ក្នុងខែសីហា កន្លងទៅ បើធៀបនឹងខែកក្កដា ដោយសារ តែគ្មានគម្រោងអភិវឌ្ឍន៍អចលនទ្រព្យ ចាប់ផ្ដើមថ្មីអំឡុងខែបុណ្យសែនខ្មោចស្រេកឃ្លាន (Hungry Ghost Month) តាមជំនឿរបស់ជនជាតិចិន។
ដោយមិនទាន់ទាំងរាប់បញ្ចូលខុនដូ Executive Condominium (ប្រភេទខុនដូសម្រាប់អ្នកមានវណ្ណៈកណ្ដាល) បណ្ដាក្រុមហ៊ុនអភិវឌ្ឍន៍អចលនទ្រព្យ បានលក់ផ្ទះបានចំនួន៤៣៧យូនីត កាលពីខែមុន ដោយធ្លាក់ចុះពីចំនួន៨៣៤យូនីត ដែលលក់បានក្នុងខែកក្កដា។ នេះបើយោងតាមតួលេខដែលអាជ្ញាធរអភិវឌ្ឍន៍ក្រុង (URA) បានចេញផ្សាយកាលពីថ្ងៃព្រហស្បតិ៍ ទី១៥ ខែកញ្ញា។
លើកចុងក្រោយបង្អស់ ដែលការលក់ប្រចាំខែធ្លាក់ចុះខ្លាំង គឺនៅក្នុងខែមេសា ឆ្នាំ២០២០ ជាពេលដែលវិបត្តិកូវីដ-១៩ ទើបតែចាប់ផ្ដើមផ្ទុះនៅក្នុងប្រទេសនេះ ដោយពេលនោះផ្ទះថ្មីៗ លក់បានត្រឹមតែ២៧៧យូនីតប៉ុណ្ណោះ។
បើធៀបនឹងអត្រាប្រចាំឆ្នាំ ការលក់ផ្ទះក្នុងខែសីហា បានធ្លាក់ចុះរហូតដល់ទៅ៦៤,១%ពីចំនួន១.២១៦យូនីត ដែលលក់បានក្នុងរយៈពេលដូចគ្នាកាលពីឆ្នាំ២០២១។
អាជ្ញាធរអភិវឌ្ឍន៍ក្រុង (URA) ឱ្យដឹងថា គ្មានគម្រោងខុនដូថ្មីៗចាប់ផ្ដើមនោះទេកាលពីខែមុន។
ទោះជាយ៉ាងណា មានគម្រោងខ្នាតតូចចំនួន២ ដែលត្រូវបានចាប់ផ្ដើម គឺគម្រោង The Jardine Residences (មាន៦យូនីត) រួមជាមួយ Lorong Chuan និងគម្រោង Mount Rosie Signature Collection (មាន៦យូនីត) នៅជិតតំបន់ Bukit Timah៕ Reuters៕