ដោយៈ ម៉ាលីនណា
ភ្នំពេញៈ ទេសាភិបាលធនាគារជាតិនៃកម្ពុជា លោកជា ចាន់តូបានថ្លែងថា ទុនបម្រុងអន្តរជាតិកម្ពុជាបន្តរក្សាបាន នៅក្នុងកម្រិតគ្រប់គ្រាន់ស្មើនឹងប្រមាណ៧ខែ នៃការនាំចូលទំនិញ និងសេវាដែលខ្ពស់ជាងកម្រិតអប្បបរមា ដែលប្រទេសកំពុងអភិវឌ្ឍន៍គួរមាន៣ខែ។
លោកបានមានប្រសាសន៍ឲ្យដឹងកាលពីសប្តាហ៍មុន ក្នុងជំនួបជាមួយប្រតិភូអន្តរជាតិមួយក្រុមថា ចំពោះតម្លៃប្រាក់រៀល អត្រាប្ដូរប្រាក់រៀលធៀបទៅនឹងដុល្លារអាមេរិក មានស្ថិរភាពល្អប្រសើរ ដោយមានកម្រិតមធ្យមប្រហាក់ប្រហែលនឹងគ្រាដូចគ្នា ក្នុងរយៈពេល៨ខែ ឆ្នាំ ២០២១ ក្រោមបរិការណ៍ដែលសកម្មភាពសេដ្ឋកិច្ចងើបឡើងជាលំដាប់។
លោកបញ្ជាក់ថា “ស្ថិរភាពអត្រាប្ដូរប្រាក់ បានរួមចំណែកយ៉ាងសំខាន់ក្នុងការការពារអំណាចទិញ របស់ចំណូលប្រជាជន ក៏ដូចជាកាត់បន្ថយផលប៉ះពាល់ពីការកើនឡើងនៃអតិផរណា”។
លោកជា ចាន់តូបានបន្តថា ចំពោះប្រព័ន្ធធនាគារគ្រឹះស្ថានធនាគារ និងហិរញ្ញវត្ថុបន្តមានសុខភាពល្អ និងមានភាពធន់នឹងវិបត្តិ ព្រមទាំងបានចូលរួមកាត់បន្ថយផលប៉ះពាល់ពីវិបត្តិកូវីដ១៩ និងគាំទ្រសកម្មភាពសេដ្ឋកិច្ចក្នុងដំណាក់កាលងើបឡើងវិញ៕