ដោយៈគង់ ម៉ាលីនណា
ភ្នំពេញៈ រដ្ឋមន្រ្តីក្រសួងទេសចរណ៍កម្ពុជា លោកថោង ខុនបានលើកឡើងថា ភ្ញៀវទេសចរក្នុងតំបន់អាស៊ាន ពិសេសប្រទេសនៅជាប់ព្រំដែន នឹងដើរតួនាទីសំខាន់ ក្នុងការស្តារវិស័យទេសចរណ៍កម្ពុជាឡើងវិញ ខណៈភ្ញៀវមកពីប្រទេសឆ្ងាយៗ ហាក់នៅមិនទាន់មានពន្លឺក្តីរំពឹង ដល់វិស័យទេសចរណ៍កម្ពុជានៅឡើយ។
ការលើកឡើងបែបនេះរបស់ លោក ថោង ខុនបានធ្វើឡើងកាលពីសប្តាហ៍មុន ដោយលោកបានថ្លែងថា តាមការព្យាករនៅក្នុងឆ្នាំ ២០២២ នេះកម្ពុជា អាចនឹងទទួលបានភ្ញៀវអន្តរជាតិពី១,៥ ទៅ២លាននាក់ ខណៈចាប់ពីខែមករា-ខែសីហា ឆ្នាំ២០២២ ទេសចរអន្តរជាតិមកទស្សនាកម្ពុជា មាន ៩៩៨ ២៧២នាក់ កើន៧២០ភាគរយ បើធៀបនឹងរយៈពេលដូចគ្នាឆ្នាំ ២០២១ ប៉ុន្តែបើធៀបរយៈពេលដូចគ្នាកាលពីឆ្នាំ ២០១៩ គឺថយចុះ -៧៧ ភាគរយ។
យោងតាមទិន្នន័យក្រសួងទេសចរណ៍ ក្នុងចំណោមភ្ញៀវទាំង៩៩៨, ២៧២ នាក់នោះ គឺមានមកពីប្រទេសថៃ៣៤៨, ៦៦០នាក់ កើន៤៧៧ ភាគរយធៀបរយៈពេលដូចគ្នាឆ្នាំ២០២១ ភ្ញៀវវៀតណាម២៣៥,៥៤៦ នាក់ កើន៣០១៧,៣ ភាគរយ ដោយភ្ញៀវប្រទេសទាំង២ គឺស្មើនឹង៥៨,៥ ភាគរយនៃចំនួនភ្ញៀវសរុប។
ក្រៅពីនោះមានមកពីប្រទេសចិន អាមេរិក ឥណ្ឌូនេស៊ី កូរ៉េខាងត្បូង ម៉ាឡេស៊ី បារាំង ចក្រភពអង់គ្លេស និងប្រទេសឡាវជាដើម។
លោកថោង ខុន បានថ្លែងថា យោងតាមការព្យាករ ចុងក្រោយឆ្នាំ ២០២២ នេះ កម្ពុជាអាចនឹងទទួលបាន ទេសចរអន្តរជាតិចាប់ពី១,៥ លាននាក់ទៅ២លាននាក់។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន បានមានប្រសាសន៍ថា ចំនួនភ្ញៀវទេសចរអន្តរជាតិមកកម្សាន្ត និងធ្វើធុរកិច្ចនៅកម្ពុជា ពិតជាកើនឡើង ប៉ុន្តែនៅមានកម្រិត ដោយអ្វីៗត្រូវការពេលបន្ថែមទៀត ខណៈស្ថានភាពវិស័យទេសចរណ៍ពិភពលោក មិនទាន់ល្អនៅឡើយ។
លោកបញ្ជាក់ថា បច្ចុប្បន្នគឺមានតែភ្ញៀវ ក្នុងតំបន់អាស៊ានប៉ុណ្ណោះដែលជាក្តីរំពឹង សម្រាប់វិស័យទេសចរណ៍យើង ខណៈសម្រាប់ភ្ញៀវមកពីក្រៅតំបន់នៅមានចំនួនតិចតួចបំផុត។ វិស័យទេសចរណ៍កម្ពុជាកំពុងទទួលបានផលវិជ្ជមានពីទេសចរណ៍ក្នុងតំបន់។
ទោះយ៉ាងណា លោកបញ្ជាក់ថា ដោយសារស្ថានភាពពិភពលោកនៅមិនទាន់ច្បាស់លាស់ (ជំងឺកូវីដ ១៩ វិបត្តិនយោបាយសេដ្ឋកិច្ច)។ ដូច្នេះលោកមិនទាន់ហ៊ានសន្និដ្ឋានថា ភ្ញៀវទេសចរអន្តជាតិចូលមកកម្ពុជានឹងអាចមានចំនួនប៉ុន្មាននោះទេ។
បន្ថែមលើនេះ ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានប្រាប់ថា ចំនួនភ្ញៀវទេសចរបរទេសចូលមកកម្ពុជាបានកើនឡើងវិញ ជាបន្តបន្ទាប់ចាប់តាំងពីរាជរដ្ឋាភិបាល ប្រកាសបើកប្រទេសឡើងវិញ កាលពីពាក់កណ្តាលខែវិច្ឆិកា ឆ្នាំ ២០២១។
លោកស្រីបន្តថា ក្នុងនាមប្រតិបត្តិករទេសចរណ៍លោកស្រី ពិតជាចង់ឱ្យវិស័យនេះ មានដំណើរការល្អឡើងវិញណាស់ ដោយនៅពេលនេះកម្ពុជាមានផលិតផល ក្នុងវិស័យទេសចរណ៍ជាច្រើនត្រូវបានរៀបចំ និងកែច្នៃដើម្បីត្រៀមទទួលកំណើនភ្ញៀវទេសចរពីគ្រប់តំបន់។
លោកស្រីបញ្ជាក់ថា “ភ្ញៀវក្នុងតំបន់បានឈរមុខគេ ក្នុងនាមជាអ្នកធ្វើដំណើរមកកម្ពុជាច្រើនជាងគេ ពិសេសមកពីប្រទេសថៃ និងវៀតណាម”។
លោកស្រីបន្តថា ការទទួលបានពានរង្វាន់ផ្នែកទេសចរណ៍ លំដាប់អន្តរជាតិជាបន្តបន្ទាប់ ពិសេសពីស្ថាប័ន World Tra-vel Awards កាលពីសប្តាហ៍មុន នឹងរួមចំណែកបន្ថែមទៀត ក្នុងការផ្សព្វផ្សាយពីសក្តានុពលនៃវិស័យទេសចរណ៍កម្ពុជា ឱ្យបានកាន់តែទូលំទូលាយ ទៅប្រជាជនលើពិភពលោកឱ្យស្គាល់ពីកម្ពុជាកាន់តែច្រើន។
ក្នុងព្រឹត្តិការណ៍ពិព័រណ៍ទេសចរណ៍អន្តរជាតិ ITE HCMC 2022 ដែលរៀបចំនៅក្នុងទីក្រុងហូជីមិញ ប្រទេសវៀតណាម កាលពីថ្ងៃទី ៧ ខែកញ្ញា ឆ្នាំ ២០២២ វិស័យទេសចរណ៍កម្ពុជា ទើបទទួលបានពានរង្វាន់ចំនួន ២ ពីស្ថាប័ន World Travel Awards ដោយទី១ ពានរង្វាន់គោលដៅទេសចរណ៍វប្បធម៌ឈានមុខគេ ក្នុងទ្វីបអាស៊ីឆ្នាំ ២០២២ (Asia’s Leading Culture Destination 2022) និងទី២ ពានរង្វាន់គោលដៅទេសចរណ៍យុវជនឈានមុខគេ ទ្វីបអាស៊ីឆ្នាំ ២០២២ (Asia’s Leading Youth Travel Destination 2022)៕
