ដោយ: លាងហួរ
បាងកក: គម្រោងមេហ្គា “One Bangkok” ដែលមានតម្លៃ១២០ពាន់លានបាត (ប្រហែលជាង៣ពាន់លានដុល្លារ) នឹងក្លាយជាគម្រោងអភិវឌ្ឍន៍អចលនទ្រព្យខ្នាតធំដំបូងគេ នៅកណ្តាលទីក្រុងបាងកក ដែលមានស្តង់ដារការរចនាថ្មី។
គម្រោងដ៏ធំនេះមានផ្ទៃដី១០៤រ៉ៃ (ស្មើនឹង១៦,៦៤ហិកតា) ស្ថិតនៅកែងផ្លូវ Wireless និងរាមាទី៤ ដែលបង្កើតឡើងដោយក្រុមហ៊ុន Frasers Property Limited សហការជាមួយក្រុមហ៊ុនសំណង់ឈានមុខគេរបស់ប្រទេសគឺ Siam Cement Group (SCG)។
គម្រោងនេះមានគោលបំណងបង្កើតអគារការិយាល័យលំដាប់ខ្ពស់ សណ្ឋាគារ និងកន្លែងលក់រាយ ព្រមទាំងអគារលំនៅដ្ឋានប្រណិតៗ ដែលមានផ្ទៃដីសរុប១៦៦.៤០០ម៉ែត្រការ៉េ។
ថ្មីៗនេះ ក្រុមហ៊ុនទាំងពីរបានចុះហត្ថលេខាលើអនុស្សរណៈនៃការយោគយល់គ្នា (MoU) ដើម្បីគ្រប់គ្រងគម្រោងដោយប្រើការអនុវត្តសំណង់ប្រកបដោយនិរន្តរភាពក្រោមសារាចរ គោលការណ៍សេដ្ឋកិច្ចក្នុងបួនទិដ្ឋភាព ការប្រើប្រាស់ជញ្ជាំង ធ្វើពីបេតុងកែច្នៃពីគំនរគ្រឹះ ការប្រើប្រាស់របាំងសំឡេង Q-CON ដែលផលិតពីឥដ្ឋស្រាលកែច្នៃឡើងវិញ ការគ្រប់គ្រងកាកសំណល់ក្នុងកន្លែងសំណង់ និងការប្រែក្លាយកាកសំណល់អាហារទៅជាជី។
ក្រុមហ៊ុនទាំង២ Frasers Property និង SCG សង្ឃឹមថាកិច្ចសហប្រតិបត្តិការរបស់ពួកគេនឹងជួយលើកកំពស់ស្តង់ដារឧស្សាហកម្មសំណង់ ទាក់ទងនឹងនិរន្តរភាព ដែលអាចអនុវត្តបាន ចំពោះគម្រោងគ្រប់ខ្នាត។
លោក Panote Sirivadhanabhakdi នាយកប្រតិបត្តិគ្រុបនៃក្រុមហ៊ុន Frasers Property Limited បាននិយាយថាគម្រោង “One Bangkok” គឺជាស្នាដៃមួយរបស់ ក្រុមហ៊ុន Frasers Property ដែលខិតខំបង្កើតស្តង់ដារថ្មីក្នុងការរចនា និងនិរន្តរភាពសម្រាប់ទេសភាពអចលនទ្រព្យរបស់ប្រទេសថៃ។
លោកបានបន្ថែមថា យើងបានធ្វើការជាមួយក្រុមហ៊ុន SCG ដែលជាដៃគូយុទ្ធសាស្ត្ររបស់យើង ក្នុងការបង្កើតតម្លៃដល់គម្រោង ដោយដាក់មូលដ្ឋានគ្រឹះ សម្រាប់ការសាងសង់ប្រកបដោយនិរន្តរភាព ក្រោមគោលការណ៍សេដ្ឋកិច្ចរាងជារង្វង់៕