ដោយៈ ម៉ាលីនណា
ភ្នំពេញៈ មន្រ្តីជាន់ខ្ពស់ក្រសួងពាណិជ្ជកម្ម បានស្នើសុំជំនួយហិរញ្ញវត្ថុ និងបច្ចេកទេសពីធនាគារអភិវឌ្ឍន៍អាស៊ី (ADB) ក្នុងគោលដៅពង្រឹងវិស័យធុរកិច្ចឌីជីថល។
មន្ត្រីជាន់ខ្ពស់កម្ពុជាផ្នែកនេះទទួលស្គាល់ថា កម្ពុជានៅមានកង្វះខាតនៅឡើយ។
លោកសុខ សុភ័ក្ររដ្ឋលេខាធិការក្រសួងពាណិជ្ជកម្មបានលើកសំណើរនេះឡើង ក្នុងឱកាសវេទិកាលើកទី១០ ស្តីពីកិច្ចសម្រួលពាណិជ្ជកម្មអាស៊ី-ប៉ាស៊ីហ្វិក ដែលសហការរៀបចំដោយធនាគារអភិវឌ្ឍន៍អាស៊ី(ADB) គណៈកម្មការសេដ្ឋកិច្ច និងសង្គមនៃអង្គការសហប្រជាជាតិ ដើម្បីអាស៊ីនិងប៉ាស៊ីហ្វិក (UN-ESCAP) និងក្រសួងឧស្សាហកម្ម និងពាណិជ្ជកម្មសិង្ហបុរី ពីថ្ងៃទី ២៩ ខែសីហា ដល់ថ្ងៃទី១ ខែ កញ្ញា ឆ្នាំ ២០២២។ នេះបើតាមការប្រកាសឱ្យដឹងពីក្រសួងពាណិជ្ជកម្មកម្ពុជា។
ក្នុងជំនួបទ្វេភាគីរវាង ប្រធានក្រុមសេដ្ឋវិទូប្រចាំធនាគារ ADB លោកAlbert Park ដើម្បីផ្លាស់ប្ដូរយោបល់លើវឌ្ឍនភាពថ្មីៗ ក្នុងវិស័យពាណិជ្ជកម្ម និងវិនិយោគនៅកម្ពុជា លោក សុខ សុភ័ក្ត្រ បានស្នើទៅកាន់ ADB ឱ្យពិចារណាផ្តល់ជំនួយផ្នែកធនធានហិរញ្ញវត្ថុ និងបច្ចេកទេស ដើម្បីបម្រើសកម្មភាពដោះស្រាយបញ្ហាប្រឈមនានា ក្នុងនោះផ្តោតជាពិសេសលើវិស័យធុរកិច្ចឌីជីថល។
មន្រ្តីជាន់ខ្ពស់ក្រសួងពាណិជ្ជកម្មកម្ពុជា បានបង្ហើបឲ្យដឹងថា បញ្ហា
ប្រឈមរបស់កម្ពុជារួមមាន ការរៀបចំគោលនយោបាយយុទ្ធសាស្ដ្រសម្រាប់ការស្ដារឡើងវិញ នូវខ្សែច្រវាក់តម្លៃ និងការផ្គត់ផ្គង់ក្នុងតំបន់និងសកល ការរៀបចំគម្រោងអភិវឌ្ឍហេដ្ឋារចនាសម្ព័ន្ធបច្ចេកវិទ្យា ព័ត៌មាន និងទំនាក់ទំនង (ICT) សម្រាប់ការគាំទ្រសមាហរណកម្មឌីជីថល និងកិច្ចសម្រួលពាណិជ្ជកម្មឌីជីថល និងការពង្រឹងសមត្ថភាពនិងជំនាញ ក្នុងការចរចាពាណិជ្ជកម្មសេរីសម្រាប់មន្ដ្រីកម្ពុជា តាមរយៈវិទ្យាស្ថានបណ្ដុះបណ្ដាលពាណិជ្ជកម្ម និងស្រាវជ្រាវ (TTRI) នៃក្រសួងពាណិជ្ជកម្ម។
ជាមួយគ្នានេះ លោក ប៉ែន សុវិជាតិ អ្នកនាំពាក្យក្រសួងពាណិជ្ជម្មបានឱ្យដឹងថា ធនាគារអភិវឌ្ឍន៍អាស៊ី ADB តែងមានគម្រោងបច្ចេកទេសមួយចំនួនជួយដល់កម្ពុជា ជាពិសេសវិស័យពាណិជ្ជកម្ម ហើយកម្ពុជាស្នើសុំជំនួយដើម្បីអភិវឌ្ឍន៍សេដ្ឋកិច្ចឌីជីថល ព្រោះរាជរដ្ឋាភិបាលកម្ពុជាកំពុងអនុវត្តគោលនយោបាយសេដ្ឋកិច្ចឌីជីថល។
លោកបន្តថា សព្វថ្ងៃ យើងស្នើសុំជំនួយពីADB ហ្នឹង ព្រោះប្រទេសយើងកំពុងអនុវត្តគោលនយោបាយសេដ្ឋកិច្ចឌីជីថល។ ដោយឡែក ក្រសួងពាណិជ្ជកម្មក៏នឹងអនុវត្តគម្រោងមួយ ទាក់ទងនឹងហេដ្ឋារចនាសម្ព័ន្ធការទូតពាណិជ្ជកម្មអេឡិចត្រូនិច ក៏ដូចជាការរៀបចំបណ្តុះបណ្តាលវិស័យពាណិជ្ជកម្មអេឡិចត្រូនិក ដល់សហគ្រាសតូច និងមធ្យមជាដើម៕