ដោយៈ លាងហួរ
បាងកកៈ លោក Nuttapon Nimmanphatcharin ប្រធានទីភ្នាក់ងារលើកកម្ពស់សេដ្ឋកិច្ចឌីជីថល (DEPA) បានឱ្យដឹងថា ប្រទេសថៃគ្រោងនឹងបន្តការអភិវឌ្ឍទីក្រុងឆ្លាតវៃនៅទូទាំងប្រទេស ដោយមានជំនួយពីឯកអគ្គរដ្ឋទូតទីក្រុងឆ្លាតវៃជំនាន់ទី២ (SCA) ចំនួន១៥០រូប។
នេះបើយោងតាមសារពត៌មាន The Nations ចុះផ្សាយនៅថ្ងៃទៅ២៦ ខែសីហា ឆ្នាំ២០២២ បានឱ្យដឹងថា គន្លឹះសំខាន់ គឺត្រូវអភិវឌ្ឍ និងប្រែក្លាយភូមិកំណើតរបស់ពួកគេ ទៅជាទីក្រុងឆ្លាតវៃ និងទំនើប។
លោកបានបញ្ជាក់ថា ការក្លាយជាទីក្រុងឆ្លាតមិនមែនមានន័យថា ហេដ្ឋារចនាសម្ព័ន្ធ និងសេវាកម្មទាំងអស់នឹងប្រើការច្នៃប្រឌិត និងបច្ចេកវិទ្យាទំនើបនោះទេ។ ក្នុងនាមជាទីក្រុងឆ្លាតវៃ មានន័យថា ស្វែងរកគំនិត និងវិធីសាស្រ្ត ដើម្បីប្រើប្រាស់ធនធានក្នុងស្រុក ដែលមានទាំងអស់ក្នុងការអភិវឌ្ឍការរស់នៅឱ្យកាន់តែប្រសើរឡើងនៅជនបទ។
ការអភិវឌ្ឍប្រភេទនេះទាមទារការធានាថា ភាពរុងរឿងមាននៅទូទាំងប្រទេស ហើយវាក៏ជាមធ្យោបាយជាក់ស្តែងមួយក្នុងការលើកទឹកចិត្តយុវជនឱ្យស្នាក់ និងធ្វើការនៅស្រុកកំណើត។
DEPA បានបង្ហាញឱ្យដឹងថា កម្មវិធី SCA ដំបូង គឺជាជោគជ័យដ៏ធំធេង ដោយមានគម្រោងថ្មីសរុបចំនួន៤៩ និងការពង្រីកគម្រោង ដែលមានតម្លៃប្រហែល១,១៧ពាន់លានបាត។ កម្មវិធីនេះបានបណ្តុះបណ្តាលដោយជោគជ័យ នូវឯកអគ្គរាជទូតទីក្រុងឆ្លាតវៃចំនួន២២នាក់ មកពី២២ខេត្ត ដើម្បីដើរតួនាទីក្នុងការអភិវឌ្ឍទីក្រុងឆ្លាតវៃ ជាមួយភ្នាក់ងារក្នុងស្រុក។
ដោយទទួលបានភាពជោគជ័យ DEPA ដែលជាអ្នករៀបចំដ៏ធំ កំពុងចាប់ដៃគូជាមួយក្រុមហ៊ុន VIA Group (Thailand) Jumbo Electronics និង Cloudee Telecom ក្នុងឆ្នាំនេះ ដើម្បីពង្រីកកម្មវិធីទៅកាន់ភាពជោគជ័យជុំទីពីរ៕