ទំហំពាណិជ្ជកម្មកម្ពុជា-ចិនសម្រេចបានកំណើន១៥,៦%ក្នុងពេល៧ខែដើមឆ្នាំនេះ

ដោយៈ សុខុម

ភ្នំពេញ: ទំហំពាណិជ្ជកម្មរវាងប្រទេសកម្ពុជា និងមហាយក្សចិនបានឈានដល់ទំហំទឹកប្រាក់៦,៩៧ពាន់លានដុល្លារអាមេរិក ក្នុងរយៈពេល៧ខែដើមឆ្នាំ២០២២ ដោយសម្រេចបានកំណើន១៥,៦% បើធៀបនឹងឆ្នាំមុន។

យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា ដែលបានចេញផ្សាយកាលពីថ្ងៃពុធ ទី១០ ខែសីហា បង្ហាញថា ប្រទេសចិន នៅតែជាដៃគូពាណិជ្ជកម្មធំបំផុតរបស់កម្ពុជា បន្ទាប់មកគឺសហរដ្ឋអាមេរិក វៀតណាម ថៃ និងសិង្ហបុរី។

របាយការណ៍ដដែលឱ្យដឹងទៀតថា ទំហំពាណិជ្ជកម្មជាមួយប្រទេសចិន គ្របដណ្ដប់២១% នៃទំហំពាណិជ្ជកម្មសរុបរបស់កម្ពុជា ចំនួន៣២,៨ពាន់លានដុល្លារ អំឡុងពេលពីខែមករា ដល់ខែកក្កដា។

ចុចទីនេះដើម្បី Subscribe Telegram Channel «Cambodia Financial Times» សម្រាប់ទទួលបានព័ត៌មានថ្មីៗ

ផលិតផលសំខាន់ៗដែលកម្ពុជា នាំចេញទៅកាន់ប្រទេសចិន មានដូចជាអង្ករ ចេក ស្វាយ ដំឡូងមី និងសម្លៀកបំពាក់ជាដើម។ ចំណែកឯកម្ពុជា នាំចូលទំនិញពីប្រទេសចិន ភាគច្រើនជាវត្ថុធាតុដើមកាត់ដេរ គ្រឿងចក្រ យានយន្ត គ្រឿងឧបភោគបរិភោគ គ្រឿងអេឡិចត្រូនិច និងថ្នាំពេទ្យជាដើម។

លោកប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មមានប្រសាសន៍ថា កិច្ចសហប្រតិបត្តិការពាណិជ្ជកម្ម រវាងប្រទេ​សទាំង២ បាននិងកំពុងកើនឡើង ទោះបីជាមានផលប៉ះពាល់ជាអវិជ្ជមានពីវិបត្តិកូវីដ-១៩ យ៉ាងណាក្ដី។

លោកបានប្រាប់ទីភ្នាក់ងារព័ត៌មាន Xinhua ថា “ប្រទេសចិន គឺជាទីផ្សារដ៏ធំមួយ សម្រាប់ប្រទេសកម្ពុជា ហើយទោះបីជាមានវិបត្តិកូវីដ-១៩ យ៉ាងណាក្ដី ក៏ទំហំពាណិជ្ជកម្មទ្វេភាគីរបស់យើង បានបន្តកើនឡើងជាលំដាប់”។

លោកគូសបញ្ជាក់ថា កិច្ចព្រមព្រៀងពាណិជ្ជកម្មសេរី “ភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់” (RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) ដែលសុទ្ធតែបានចូលជាធរមានកាលពីដើមឆ្នាំ២០២២ នេះកំពុងតែបង្កើនទំនាក់ទំនងពាណិជ្ជកម្ម រវាងប្រទេសទាំង២៕ Xinhua៕

LEAVE A REPLY

Please enter your comment!
Please enter your name here