ដោយៈ លាងហួរ
ហាណូយៈ អនុរដ្ឋមន្ត្រីឧស្សាហកម្ម របស់ប្រទេសវៀតណាម បាននិយាយនៅថ្ងៃពុធនេះ ថា ប្រទេសវៀតណាម នឹងត្រូវការការវិនិយោគពី៨ពាន់លានដុល្លារ ទៅ១៤ពាន់លានដុល្លារ ក្នុងមួយឆ្នាំ រហូតដល់ឆ្នាំ២០៣០ ដើម្បីអភិវឌ្ឍរោងចក្រថាមពលថ្មី និងពង្រីកបណ្តាញអគ្គិសនីរបស់ខ្លួន។
អនុរដ្ឋមន្ត្រីក្រសួងឧស្សាហកម្ម និងពាណិជ្ជកម្ម លោក Dang Hoang An បាននិយាយនៅក្នុងសេចក្តីថ្លែងការណ៍មួយថា ក្នុងចំណោមចំនួននេះ ៧៥ភាគរយនឹងត្រូវចំណាយលើរោងចក្រថាមពលថ្មី ដោយផ្តល់អាទិភាព ដល់ប្រភពកកើតឡើងវិញ និង ២៥ភាគរយលើការពង្រីកបណ្តាញអគ្គិសនី។
លោកបន្តថា ប្រទេសនឹងស្វែងរកការប្រមូលថវិកាពីអ្នកវិនិយោគឯកជនសម្រាប់គម្រោងថាមពលថ្មីនេះ ដោយមិនមានការបញ្ជាក់លម្អិតឡើយ។
ប្រទេសវៀតណាមជាមជ្ឈមណ្ឌលផលិតកម្មក្នុងតំបន់ ដែលត្រូវការបង្កើនសមត្ថភាពផលិតថាមពល ដែលបានដំឡើងប្រហែល១០ភាគរយក្នុងមួយឆ្នាំ ដើម្បីគាំទ្រដល់សេដ្ឋកិច្ច និងប្រជាជន ដែលកំពុងរីកចម្រើនយ៉ាងឆាប់រហ័ស។
ប្រទេសវៀតណាមបានប្តេជ្ញាកាលពីឆ្នាំ២០២១ នឹងប្រែក្លាយប្រទេសទៅជាកាបូនអព្យាក្រឹត នៅត្រឹមឆ្នាំ២០៥០ និងបង្កើនសមត្ថភាពខ្យល់នៅឆ្នេរសមុទ្ររបស់ខ្លួនដល់៧ជីហ្គាវ៉ាត់ (GW) នៅឆ្នាំ២០៣០ និងដល់៦៥GW នៅឆ្នាំ២០៤៥។
ប្រទេសវៀតណាមក៏មិនបង្កើតបន្ថែមរោងចក្រថាមពលដើរដោយធ្យូងថ្មថ្មី ក្នុងផែនការអភិវឌ្ឍន៍ថាមពលមេរបស់ខ្លួនទេ ហើយវៀតណាមនឹងបន្តគម្រោងធ្យូងថ្ម ដែលកំពុងសាងសង់រហូតដល់ឆ្នាំ២០៣០៕
