ដោយៈ គង់ ម៉ាលីនណា
ភ្នំពេញៈ ក្រុមអ្នកវិនិយោគ និងពាណិជ្ជករបានរួមគ្នា បង្កើតសមាគមផលិតផលធ្វើដំណើរ និងស្បែកនៅកម្ពុជា បានបើកសម្ពោធជាផ្លូវការកាលពីចុងសប្តាហ៍មុននេះ។
សមាគមនេះ នឹងដើរតួនាទីតំណាងឱ្យវិស័យ ដែលកំពុងមានការរីកចម្រើនទាំងកំណើនការនាំចេញ និងទាក់ទាញលំហូរវិនិយោគរាប់រយលានដុល្លារ ជាពិសេសបង្កើតការងារបានរាប់ម៉ឺនកន្លែង ក្នុងរយៈពេលប៉ុន្មានឆ្នាំចុងក្រោយនេះ។
លោកជំទាវឧបនាយករដ្ឋមន្ត្រី ម៉ែន សំអនរដ្ឋមន្រ្តីក្រសួងទំនាក់ទំនងរដ្ឋសភា ព្រឹទ្ឋសភាបានមានប្រសាសន៍ថា ស្ថានភាពផលិតកម្ម និងទីផ្សារនាំចេញរបស់កម្ពុជា ទៅទីផ្សារអន្តរជាតិ កំពុងបង្ហាញសញ្ញាវិជ្ជមាន លើគ្រប់វិស័យ ដោយកំណើនរួមចំណែកយ៉ាងច្រើន ក្នុងការបង្កើតការងារថ្មីៗ និងប្រាក់ចំណូលសម្រាប់គ្រួសារ និងសេដ្ឋកិច្ចជាតិ។
លោកស្រីបន្ថែមថា “ដើម្បីលើកស្ទួយទីផ្សារនាំចេញផលិតផល ធ្វើដំណើរ និងស្បែកនៅកម្ពុជាឱ្យកាន់តែរឹងមាំ រោងចក្រផលិតនីមួយៗត្រូវគិតគូរឱ្យបានច្បាស់លើគុណភាព និងលទ្ធភាពក្នុងការប្រកួតប្រជែងលើទីផ្សារអន្តរជាតិ”។លោកជំទាវបានបន្តថា “ខ្ញុំសូមលើកទឹកចិត្តដល់ប្រធាន សមាជិក និងសមាជិកានៃសមាគមទាំងមូល សូមបន្តការប្ដេជ្ញាចិត្ត ព្រមទាំងចូលរួមសកម្ម ក្នុងការលើកស្ទួយវិស័យផលិតផលធ្វើដំណើរ និងស្បែកនៅកម្ពុជាឱ្យកាន់តែរឹងមាំ ប្រកបដោយគុណភាព និងមានលទ្ធភាពគ្រប់គ្រាន់ក្នុងការប្រកួតប្រជែងលើទីផ្សារអន្តរជាតិ រួមចំណែកជំរុញកំណើនសេដ្ឋកិច្ចកម្ពុជាឱ្យមានសម្ទុះខ្លាំង”។
ប្រធានកិត្ដិយសអចិន្រ្តៃយ៍ សមាគមផលិតផលធ្វើដំណើរ និងស្បែកនៅកម្ពុជា លោកលី ឃុនថៃ បានមានប្រសាសន៍ឲ្យដឹងថា គោលបំណងចម្បងរបស់សមាគម គឺការចងក្រងក្រុមហ៊ុនផលិត ផលិតផលធ្វើដំណើរ និងស្បែកឱ្យមានសំឡេងតែមួយ ដើម្បីធ្វើការផ្សព្វផ្សាយ ឬរៀបចំយុទ្ធសា ស្ត្រទាក់ទាញអ្នកវិនិយោគ ឬអ្នកបញ្ជាទិញពីកម្ពុជាឱ្យបានកាន់តែច្រើនចូលរួមជួយសម្របសម្រួលជាមួយអាជ្ញាធរ និងផ្នែកពាក់ព័ន្ធដើម្បីជំរុញដំណើរការផលិត និងគុណភាពផលិតផល និងរៀបចំវគ្គបណ្តុះបណ្តាលជំនាញដល់ក្រុមកម្មករជាដើម៕