ដោយៈ ម៉ាលីនណា
ភ្នំពេញៈ ទំហំនាំចេញរបស់កម្ពុជានៅតែមានភាពប្រសើរឡើងនៅទីផ្សារអាមេរិក និងអឺរ៉ុប ដោយបច្ចុប្បន្នការនាំចេញផលិតផលធ្វើដំណើរ និងស្បែកពីកម្ពុជា សម្រេចបានទឹកប្រាក់៨០២,៦៥លានដុល្លារអាមេរិក។
ការនាំចេញផលិតផលធ្វើដំណើរ និងស្បែកពីកម្ពុជាទៅទីផ្សារអន្តរជាតិក្នុងឆមាសទី១ ឆ្នាំនេះ បានកើនឡើងរហូតដល់៥៩,៤៨ភាគរយ បើធៀបនឹងរយៈពេលដូចគ្នាឆ្នាំ២០២១។ នេះបើយោងតាមសមាគមផលិតផលធ្វើដំណើរ និងស្បែកនៅកម្ពុជា ដែលទើបបានបង្កើតឡើងនិងប្រកាសជាផ្លូវការកាលពីសប្តាហ៍មុន។
ប្រធានកិត្ដិយសអចិន្រ្តៃយ៍ សមាគមផលិតផលធ្វើដំណើរ និងស្បែកនៅកម្ពុជា លោកឧកញ៉ាលី ឃុនថៃ បានមានប្រសាសន៍ឲ្យដឹងថា គោលបំណងចម្បងរបស់សមាគម គឺការចងក្រងក្រុមហ៊ុនផលិតផលិតផលធ្វើដំណើរ និងស្បែកឱ្យមានសំឡេងតែមួយ ដើម្បីធ្វើការផ្សព្វផ្សាយ ឬរៀបចំយុទ្ធសាស្ត្រទាក់ទាញអ្នកវិនិយោគ ឬអ្នកបញ្ជាទិញពីកម្ពុជាឱ្យបានកាន់តែច្រើនចូលរួមជួយសម្របសម្រួលជាមួយអាជ្ញាធរ និងផ្នែកពាក់ព័ន្ធដើម្បីជំរុញដំណើរការផលិត និងគុណភាពផលិតផល និងរៀបចំវគ្គបណ្តុះបណ្តាលជំនាញដល់ក្រុមកម្មករជាដើម។
លោកបន្តថា “បន្ទាប់ពីស្ងប់ស្ងាត់មួយរយៈ ដែលបណ្តាលពីវិបត្តិជំងឺកូវីដ ១៩ ទីផ្សារនាំចេញផលិតផលធ្វើដំណើរ និងស្បែកកម្ពុជា បានស្ទុះឡើងវិញហើយ”។
លោកបញ្ជាក់ថា តាមរយៈកំណើននៃតម្រូវការទីផ្សារ ផលិតផលធ្វើដំណើរ និងស្បែកលើពិភពលោក និងការបង្កើតសមាគមនេះ លោករំពឹងថា ចំនួននៃការបញ្ជាទិញពីក្រៅប្រទេស និងការចូលមកបណ្តាក់ទុននៅកម្ពុជានឹងមានចំនួនកាន់តែច្រើន ខណៈក្រៅពីមានកម្លាំងពលកម្មសម្បូរបែប កម្ពុជា ក៏ជាប្រទេសមានច្បាប់វិនិយោគ អំណោយផលសម្រាប់ការបណ្តាក់ទុនផងដែរ៕
បើតាមលោក ឃុន ថៃ បច្ចុប្បន្នរោងចក្រផលិតផលិតផលធ្វើដំណើរ និងស្បែកនៅកម្ពុជា មានប្រមាណ ១២០ ដោយមានម្ចាស់ជាវិនិយោគិនមកពីប្រទេសចិន ហុងកុង ចិនតៃប៉ិ ជាដើម។ ទីផ្សារធំរបស់ផលិតផលធ្វើដំណើរ និងស្បែកនៅកម្ពុជា មានដូចជា អាមេរិក សហគមន៍អឺរ៉ុប អង់គ្លេស ជប៉ុន កូរ៉េ និងប្រទេសក្នុងតំបន់មួយចំនួន។