ដោយៈ លក្ខិណា
ភ្នំពេញៈ ស្រុកកំរៀង នៃខេត្តបាត់ដំបង ចាត់ទុកជាស្រុកមួយដែលមានប្រជាជនប្រើប្រាស់ឥណទានពីធនាគារ និងមីក្រូហិរញ្ញវត្ថុច្រើនជាងគេក្នុងចំណោមបណ្ដាស្រុកជាច្រើន ទៀតទូទាំងប្រទេសកម្ពុជា។
បើគិតត្រឹមដំណាច់ខែមិថុនា ឆ្នាំ២០២២ កន្លងទៅនេះ ស្រុកកំរៀងមានសម្ពាធឥណទាន សរុបចំនួន៦១លានដុល្លារអាមេរិក និងមានអ្នកប្រើប្រាស់ឥណទានចំនួនជិត៣ម៉ឺននាក់។ នេះបើតាមលោកគា បូរាណសមាជិកក្រុមប្រឹក្សាភិបាលនៃ សមាគមមីក្រូហិរញ្ញវត្ថុកម្ពុជា។
លោកបានមានប្រសាសន៍ថា នៅក្នុងស្រុកកំរៀង ខេត្តបាត់ដំបងនេះ មានគ្រឹះស្ថានធនាគារ និងមីក្រូហិរញ្ញវត្ថុចំនួន២២ស្ថាប័ន បាននិងកំពុងផ្ដល់សេវាឥណទាន ដល់ប្រជាពលរដ្ឋ ហើយនៅក្នុងអំឡុងនៃវិបត្តិកូវីដ១៩ គ្រឹះស្ថានធនាគារ និងមីក្រូហិរញ្ញវត្ថុ ដែលមានប្រតិបត្តិការនៅក្នុងស្រុកំរៀងក៏បានរៀបចំឥណទានឡើងវិញ ជូនអតិថិជនមានទឹកប្រាក់ជាងកន្លះលានដុល្លារអាមេរិកផងដែរ។
ជាមួយគ្នានេះ លោកជា ចាន់តូ ទេសាភិបាលធនាគារជាតិនៃកម្ពុជាក៏បានថ្លែងកាលពីពេលថ្មីៗនេះឱ្យដឹងថា ជាមួយនឹងកត្តាសុខសន្តិភាព និងស្ថិរភាពនយោបាយ បានបង្កបរិយាកាស ដល់ការអភិវឌ្ឍលើគ្រប់វិស័យ វិស័យធនាគារ និងហិរញ្ញវត្ថុ ទទួលបានការអភិវឌ្ឍរីកចម្រើន ជាបន្តបន្ទាប់ផងដែរ ។ ជាក់ស្ដែងការខ្ចីបុល ដែលកាលពីមុន មានការខ្ចីបុលក្រៅផ្លូវការច្រើន តែ បន្ទាប់ពីមានអាជ្ញាធរ ត្រួតពិនិត្យប្រព័ន្ធធនាគារ និងហិរញ្ញវត្ថុ ការខ្ចីបុល ក៏បានផ្លាស់ប្តូរពីការខ្ចីបុលក្រៅផ្លូវការ មកជាការខ្ចីបុលពីគ្រឹះស្ថានធនាគារនិងហិរញ្ញវត្ថុវិញ ដើម្បីផ្ដល់ដល់អ្នកមានតម្រូវការសាច់ប្រាក់ពិតប្រាកដ ដែលអាចជៀសវាងការកេងប្រវ័ញ្ច។
លោកបន្តថា ក្នុងនាមជាអាជ្ញាធររូបិយវត្ថុ និងត្រួតពិនិត្យប្រព័ន្ធធនាគារជាតិនៃកម្ពុជា គឺហាមដាច់ខាត ក្នុងការរក្សាលិខិតយថាភូតច្បាប់ដើមរបស់អតិថិជន ដូចជាអត្តសញ្ញាណបណ្ណ ឬសៀវភៅគ្រួសារ សៀវភៅស្នាក់នៅ សម្រាប់ធានាលើការផ្ដល់ឥណទាន ពីព្រោះលិខិតយថាភូតទាំងនោះ ត្រូវបានប្រើប្រាស់សម្រាប់បញ្ជាក់បុគ្គល និងស្រង់ស្ថិតិតែប៉ុណ្ណោះ និងពុំមានតម្លៃសេដ្ឋកិច្ច សម្រាប់ការធានាលើឥណទាន ឬគោលបំណងផ្សេងទៀតនោះទេ។
លោកបន្តថា “បើសិនជាគ្រឹះស្ថានណា នៅបន្តរក្សាលិខិតយថាភូតច្បាប់ដើមរបស់អតិថិជន ត្រូវប្រគល់ជូនអតិថិជនវិញភ្លាម”៕