ដោយៈ សុខុម
ភ្នំពេញ: យោងតាមរបាយការណ៍ពីអគ្គនាយកដ្ឋានគយ និងរដ្ឋាករកម្ពុជាបានបង្ហាញថា ការនាំចេញផលិតផលវាយនភណ្ឌ កាត់ដេរ ស្បែកជើង និងផលិតផលធ្វើដំណើរផ្សេងៗទៀតរបស់កម្ពុជា សម្រេចបានកំណើន៤០%ក្នុងឆមាសទី១ ដើមឆ្នាំ២០២២។
របាយការណ៍ដដែលបង្ហាញថា កម្ពុជាបាននាំចេញទំនិញទាំងនេះដែលមានតម្លៃសរុប រហូតដល់ទៅ៦,៦ពាន់លានដុល្លារអាមេរិក អំឡុងខែមករា ដល់ខែមិថុនា ឆ្នាំនេះ ដោយសម្រេចបានកំណើន៤០% បើធៀបនឹង៤,៧២ពាន់លានដុល្លារអាមេរិក ក្នុងរយៈពេលដូចគ្នាឆ្នាំ២០២១។
លោកប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្ម និងជាអ្នកនាំពាក្យក្រសួងនេះ បានចាត់ទុកកំណើននេះថា មកពីការបន្តឡើងវិញយ៉ាងពេញលេញ នូវសកម្មភាពសេដ្ឋកិច្ចសង្គមនៅកម្ពុជា ការអនុគ្រោះពាណិជ្ជកម្ម និងកំណើនតម្រូវការរបស់ពិភពលោក។
លោកបានថ្លែងប្រាប់ទីភ្នាក់ងារព័ត៌មានចិន Xinhua កាលពីថ្ងៃច័ន្ទ ទី១ ខែសីហា ថា “កិច្ចព្រមព្រៀងភាពជាដៃគូសេដ្ឋកិច្ច ទូលំទូលាយក្នុងតំបន់ (RCEP) ជាកិច្ចព្រមព្រៀងពាណិជ្ជកម្មសេរី ដែលបានចូលជាធរមានក្នុងខែមករា (ឆ្នាំ២០២២) ក៏បានរួមចំណែកដល់កំណើននេះផងដែរ”។
កិច្ចព្រមព្រៀងពាណិជ្ជកម្មសេរី (RCEP) មានការចូលរួមពីប្រទេសចំនួន១៥នៅអាស៊ី-ប៉ាស៊ីហ្វិក រួមទាំងប្រទេសសមាជិកទាំង១០របស់អាស៊ាន ផងដែរ។ ប្រទេសទាំង១៥នោះមានដូចជា កម្ពុជា ព្រុយណេ ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ វៀតណាម ចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់៕ Xinhua៕
