ដោយៈ ម៉ាលីនណា
ភ្នំពេញៈ កម្មវិធីកសិកម្មអន្តរជាតិកូរ៉េទី២ បាននិងកំពុងជួយកម្ពុជា ដើម្បីស្រាវជ្រាវពូជពោតក្រហម ដែលជាគ្រាប់ពូជអីប្រ៊ិដកម្ពុជាទី២ បន្ថែមទៀត ដើម្បីឆ្លើយតបនឹងតម្រូវការទីផ្សារ នាំចេញទៅក្រៅប្រទេស និងការផលិតចំណីសត្វនៅក្នុងស្រុក។
នៅក្នុងជំនួបជាមួយប្រធានថ្មីនៃកម្មវិធីកសិកម្មអន្តរជាតិកូរ៉េ ហៅកាត់ថា KOPIA កាលពីសប្តាហ៍មុន លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងថា កម្មវិធីកសិកម្មអន្តរជាតិកូរ៉េ KOPIA បានជួយយ៉ាងច្រើន លើការងារបណ្ដុះបណ្ដាល ស្រាវជ្រាវពូជដំណាំដែលកំពុងមានសក្ដានុពល ដូចជាពូជពោតក្រហម ដែលជាដំណាំដ៏មានសក្ដានុពលសម្រាប់កម្ពុជា ដោយពូជថ្មីនេះនឹងអាចពង្រីកផលិតកម្ម ឱ្យកាន់តែច្រើន ស្របតាមទស្សនវិស័យវែងឆ្ងាយរបស់ក្រសួង ក្នុងការជំរុញការផលិត ផ្គត់ផ្គង់ទូទាំងប្រទេសសម្រាប់ផលិតចំណីសត្វ និងឈានទៅធ្វើការនាំចេញពោតក្រហមឱ្យបានច្រើនថែមទៀត។
លោកបានបញ្ជាក់ថា “យើងសូមស្នើដល់ភាគីកូរ៉េ និងអគ្គនាយកដ្ឋានកសិកម្មបន្តកិច្ចសហការដ៏ល្អនេះ ដើម្បីជំរុញការផលិត និងបន្តការបង្កាត់ពូជថ្មីៗបន្ថែមទៀត គឺពូជ CHM02 និង CHM03”។ លោកបន្តថា “ទន្ទឹមនឹងនេះ ដើម្បីនិរន្តរភាពនៃការផលិត និងបង្កាត់ពូជថ្មីនេះ សម្រាប់ផ្គត់ផ្គង់ទូទាំងប្រទេស គួរពិនិត្យ ពិចារណា និងជ្រើសរើសវិស័យឯកជនដែលមានទាំងធនធាន និងសក្ដានុពលឱ្យចូលរួមក្នុងការងារនេះ”។
ជាមួយគ្នានេះ លោក Song Young Ju ប្រធានថ្មីនៃកម្មវិធីកសិកម្មអន្តរជាតិកូរ៉េ ហៅកាត់ថា KOPIA បានលើកឡើងថា ថា ពូជ CHM01 គឺទទួលបានមកពីកិច្ចខិតខំប្រឹងប្រែង សិក្សាស្រាវជ្រាវ និងបង្កាត់ដោយអ្នកជំនាញការកូរ៉េ និងមន្ត្រីជំនាញនៃអគ្គនាយកដ្ឋានកសិកម្ម នៅស្ថានីយពិសោធន៍កសិកម្ម បន្ទាយដែកលើផ្ទៃដី៧ហិកតា ដើម្បីចែកជូនកសិករតាមខេត្តគោលដៅ។
លោកបានបញ្ជាក់ទៀត “ពូជអីប្រ៊ិដកម្ពុជាទី១ (CHM01) នេះគឺជាពូជដ៏ល្អ និងអាចប្រកួតប្រជែងជាមួយពូជ នាំចូលមកពីបរទេសបាន ហើយផែនការអនុវត្ត៣ ឆ្នាំ ២០២១-២០២៣”។
លោកបានបន្ថែមថា កំណើននៃតម្រូវពូជអីប្រ៊ិដកម្ពុជាទី១ (CHM01) ដែលជាពូជដំបូងគេរបស់កម្ពុជានេះ កាន់តែមានការកើនឡើង ដោយសារតែកសិករមើលឃើញថា ពូជនេះមានគុណភាពល្អ និងប្រើរយៈពេលខ្លីក្នុងការដាំដុះ ដែលប្រសើរជាងពូជពោតដែលនាំចូល និងធ្លាប់ដាំដុះកន្លងមក។
យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទបានបង្ហាញថា ការនាំចេញគ្រាប់ពោតមានការថយចុះ ដោយសម្រេចបានចំនួន៨៤,៨៩៨,៩០តោន សម្រាប់ក្នុងឆមាសទី១ ឆ្នាំ២០២២ ធ្លាក់ចុះចំនួន៣៩,៦៥ភាគរយ បើធៀបនឹងរយៈពេលដូចគ្នាក្នុងឆ្នាំមុន៕
