ដោយៈ គង់ ម៉ាលីនណា
កំពង់ស្ពឺៈ រដ្ឋមន្រ្តីក្រសួងពាណិជ្ជកម្មលោក ប៉ាន សូរស័ក្តិ បានជំរុញឱ្យមន្ទីរពាណិជ្ជកម្មរាជធានី -ខេត្តទាំងអស់ សហការជាមួយអាជ្ញាធរមូល ដ្ឋាន ស្ថាប័នពាក់ព័ន្ធរៀបចំផ្សារចុងសប្តាហ៍ ផ្សារណាត់ ឬពិព័រណ៍ពាណិជ្ជកម្ម ដើម្បីលើកស្ទួយផលិតផលខ្មែរ។
លោកបានលើកឡើងបែបនេះ នៅក្នុងពិធីសម្ពោធពិព័រណ៍ពាណិជ្ជកម្មខេត្តកំពង់ស្ពឺ លើកទី១០ ឆ្នាំ២០២២នាថ្ងៃទី២២ ខែកក្កដា ឆ្នាំ២០២១ នៅឯខេត្តកំពង់ស្ពឺ។
លោក ប៉ាន សូរស័ក្តិ ក៏បានជំរុញឱ្យមន្ទីរពាណិជ្ជកម្មរាជធានី-ខេត្តទាំងអស់ចុះត្រួតពិនិត្យ អប់រំ ណែនាំដល់ក្រុមហ៊ុនឯកជន ដែលបានរៀបចំពិព័រណ៍ពាណិជ្ជកម្ម នៅតាមទីតាំងនានា ដែលមិនបានស្នើសុំច្បាប់អនុញ្ញាត ឱ្យពួកគាត់អនុវត្តន៍ តាមប្រកាសរបស់ក្រសួងពាណិជ្ជកម្ម ដែលកំពុងឋិតនៅជាធរមាន សំដៅពង្រឹងយន្តការកៀរគរចំណូលជូនរដ្ឋ ស្របតាមកម្មវិធីកែទម្រង់ និងគ្រប់គ្រងហិរញ្ញវត្ថុសាធារណៈ របស់ក្រសួងពាណិជ្ជកម្ម។
លោកបន្តថា មន្ទីរពាណិជ្ជកម្ម ត្រូវចូលរួមដោះស្រាយភ្លាមៗនូវរាល់បាតុភាពនានា ដែលបណ្តាលមកពីការកកស្ទះកសិផល ដែលកើតមានឡើងម្តងម្កាលនៅរដូវប្រមូលផល តាមរយៈយន្តការ និងកិច្ចសហការជាមួយអង្គភាពពាក់ព័ន្ធ ឱ្យបានទាន់ពេលេវេលា។
រដ្ឋមន្ត្រីរូបនេះ ក្រសួងពាណិជ្ជកម្ម តែងតែយកចិត្តទុកដាក់ ក្នុងការជំរុញវិស័យពាណិជ្ជកម្ម ឱ្យកាន់តែរីកចម្រើន ដោយបានធ្វើកំណែទម្រង់ស៊ីជម្រៅជាច្រើន ដូចជា ការកាត់បន្ថយចំណាយរដ្ឋបាល ពង្រឹងភាពប្រកួតប្រជែងនៅលើទីផ្សារ បង្កើតបរិយាកាសធុរកិច្ចឱ្យកាន់តែល្អប្រសើរ និងខិតខំផ្តល់សេវាសាធារណៈ និងបង្ខិតសេវាឱ្យមកកៀកនឹងដៃប្រជាពលរដ្ឋ ដើម្បីសម្រួលដល់វិស័យឯកជននានា៕