ដោយ: លាងហួរ
ជប៉ុន: សារព័ត៌មាន Nikkei business daily បានចុះផ្សាយនៅថ្ងៃសុក្រនេះថា រដ្ឋាភិបាលជប៉ុន នឹងកាត់បន្ថយការព្យាករណ៍កំណើនសេដ្ឋកិច្ចរបស់ខ្លួនក្នុងឆ្នាំ២០២២ មកនៅត្រឹមប្រហែល២ភាគរយ ពោលគឺធ្លាក់ចុះយ៉ាងខ្លាំងពីការព្យាករណ៍៣,២ភាគរយនៅក្នុងខែមករា។
វាកើតឡើងបន្ទាប់ពីការព្យាករណ៍ប្រចាំត្រីមាស កាលពីថ្ងៃព្រហស្បតិ៍របស់ធនាគារកណ្តាលជប៉ុន បានទម្លាក់ការរំពឹងទុកសម្រាប់កំណើន ក្នុងឆ្នាំនេះដល់ខែមីនាឆ្នាំ២០២៣ មកត្រឹម២,៤ភាគរយ ដែលការព្យាករណ៍ពីមុនសេដ្ឋកិច្ចប្រទេសនេះ រំពឹងសម្រេចបាន២,៩ភាគរយកាលពី៣ខែមុន។
ការបន្ទាបការព្យាករណ៍សេដ្ឋកិច្ចជប៉ុន ឆ្លុះបញ្ចាំងឱ្យឃើញពីការធ្លាក់ចុះនៃការប្រើប្រាស់ឯកជន ដោយសារការកើនឡើងជាថ្មី នៃការឆ្លងជំងឺកូវីដ១៩។
ការកើនឡើងនូវភាពមិនប្រាកដប្រជា លើសេដ្ឋកិច្ចពិភពលោក ដែលបណ្តាលមកពីសង្រ្គាមរបស់រុស្ស៊ី នៅអ៊ុយក្រែន និងការបិទទីក្រុងយ៉ាងតឹងរ៉ឹងរបស់ប្រទេសចិន ក៏ធ្វើឱ្យប៉ះពាល់ដល់ការរំពឹងទុក សម្រាប់ការស្ទុះងើបឡើងវិញជានិរន្តរភាព នៅក្នុងសេដ្ឋកិច្ចដែលពឹងផ្អែកលើការនាំចេញរបស់ប្រទេសជប៉ុនផងដែរ៕
